Република Северна Македонија е пред нов предизвик кога треба сите во државата да покажеме одговорност за европската иднина на државата и по членството во НАТО, да станеме членка на ЕУ. И јас сум убеден и работам на тоа да се израдуваме со успех, рече Ковачевски во своето обраќање на официјалното отворање на „Преспа форумот за дијалог“, кој денеска и утре се одржува во Струга
Се надевам дека дијалогот, кој стана нашиот заштитен знак, ќе ни донесе ново политичко обедување дома за да ги донесем потребните одлуки во нашето Собрание, кои имаат одредувачка насока за нашето полноправно членство во Европската Унија.
Ова вечерва го истакна премиерот Димитар Ковачевски во своето обраќање на официјалното отворање на „Преспа форумот за дијалог“, кој денеска и утре се одржува во Струга.
„Република Северна Македонија е пред нов предизвик, кога треба сите во државата да покажеме одговорност за европската иднина на државата и по членството на НАТО, да станеме членка на ЕУ. И јас сум убеден и работам на тоа да се израдуваме со успех. Го имаме најдобриот договор со ЕУ кој може да го добиеме, којшто ги штити нашите македонски идентитетски обележја, нашиот јазик, нашата култура, нашиот идентитет, со којшто никој не смее да се коцка. Ја имаме огромната и сестрана поддршка од нашиот стратешки партнер САД и од нашите европски партнери. И се надевам дека дијалогот, којшто стана нашиот заштитен знак, ќе ни донесе ново, политичко обединување дома“, рече Ковачевски.
На почетокот од своето обраќање тој пренесе поздрав од поранешниот премиер Зоран Заев, без кого и без поранешниот премиер на Грција Алексис Ципрас, како што рече, денешниот ден ќе бил обичен и ќе немало ниту Преспа, ниту форум, ниту дијалог.
„Сè уште ќе имаше преговори кои ќе траеја без некаква ориентација кога ќе завршат. Тоа е така затоа што тие двајца имаа храброст да донесат одлука, имаа визија и покажаа лидерство каква што политиканти никогаш нема да донесат бидејќи тие не гледаа на својот рејтинг за наредните избори, туку гледаа за иднината на граѓаните и на Северна Македонија и на Грција да живеат како соседни држави со добрососедски односи и двете земји да се членки на НАТО и во иднина членки на ЕУ“,
истакна Ковачевски.
Со Договорот од Преспа, рече премиерот, земјава ја обновила вербата во дипломатијата, промовирајќи го отворениот дијалог како придобивка.
„Со тоа, покажавме применлив и функционален пример за решавање кризи, што има посебно значење во денешниот геополитички контекст на случувања, за решавање слични предизвици пред коишто се исправени и регионот и Европа денес. Но, кој и да посака, кога било, да брани свои агресивни постапки или политики, ќе биде соочен со фактот дека одржливи решенија се постигнуваат на маса каде што се води дијалог, меѓу лидери кои имаат политичка волја да се разберат, во името на доброто на својот народ и својата држава“,
рече Ковачевски.
Тој, како пример го посочи тоа што пред пет години премиерите на Северна Македонија и Грција успеаја да се разберат низ дијалог затоа што имаше таква поличка волја од двете страни.
„Јас и премиерот на Бугарија Кирил Петков, ланскиот јули, успеавме да се разбереме, бидејќи водевме дијалог и затоа што имавме политичка војла од двете страни. Со вакво одговорно практикување на доверената доверба од граѓаните, за само 5 години: Република Северна Македонија ја направиме рамноправна членка на НАТО. По долги 17 години, минатата година успеавме да ги започнеме преговорите со Европската Унија, со целосна заштита на идентитетските одредници на македонскиот народ. Пример сме во регионот и во Европа за успешна, функционална, мултиетничка држава, во којашто граѓаните имаат еднакви права и одговорности пред законите. Пример сме за држава којашто преку функционални политики на дијалог ги унапредува добрососедските односи. Земјите членки на ЕУ, НАТО и САД во Република Северна Македонија денес гледаат фактор на стабилноста и безбедноста во Европа. Од земја која пред 30 години беше корисник на мировни мисии, денес ние сме земја во која што се водат разговори меѓу други држави заради долгорочно решавање на нивните спорови“,
истакна премиерот.
Поради сето ова, нагласи тој, денес е реалистично да се гледа на 2030 година како на достижна цел за полноправно членство на земјава во Европската Унија.
Говорејќи за надворешната политика на земјава, тој посочи дека Северна Македонија ефикасно се поставила на линија на надворешната политика на Европската Унија во однос на војната во Украина, покажувајќи што значи да сме обединети во демократските вредности.
„Другата опција е нестабилност, ризици и конфликти коишто во денешното време на хибридни закани, дезинформации и лажни вести се заканува на европскиот и на светскиот мир и тоа мора да е јасно за сите и кај нас дома и во регионот и во Европа. Имаме обврска да покажеме одговорност кон сопствената улога во зачувувањето на мирот во Европа. И да ја зграбиме својата заслужена шанса. Затоа што географски, културолошки, историски припаѓаме на Европа. Затоа што нашите граѓани заслужуваат европски квалитет на живот. Затоа што нашите млади заслужуваат да им се оствари сонот да живеат во Европа, а тоа да биде нивната родна земја“, Затоа што е можно да ги здружиме силите во нашиот регион и со поддршката што ја имаме од нашите европски пријатели, да ја направиме 2030 година реална цел за проширено европско семејство и интеграција во Европската Унија и на Северна Македонија и на Албанија и на Црна Гора. Целта е сите заедно рамо до рамо, братски да станеме членки на ЕУ“,
порача Ковачевски.