Ова е време на големи предизвици кои бараат храбри одлуки и заедништво. Иницијативата „Отворен Балкан“ е наша заложба за стабилен регион, владеење на мир, за соработка и за економски развој – ова е нашата заложба за подобар живот на нашите народи. Наша автохтона иницијатива за европеизација на регионот, рече Ковачевски отворајќи го работниот дел од самиот во Охрид
Со воведното обраќање на премиерот Димитар Ковачевски, претпладнево во Охрид започна самитот на иницијативата „Отворен Балкан“.
Ова е време на големи предизвици кои бараат храбри одлуки и заедништво. Иницијативата „Отворен Балкан“ е наша заложба за стабилен регион, владеење на мир, за соработка и за економски развој – ова е нашата заложба за подобар живот на нашите народи. Наша автохтона иницијатива за европеизација на регионот, рече Ковачевски отворајќи го работниот дел од самиот.
Тој потсети на досегашните први резултати на иницијативата – зелената лента за транспортни возила на граничните премини „Ќафасан“ и „Табановце“, со кои се овозможува значително побрз проток на камионите кои превезуваат земјоделски производи или храна. Тој рече дека ова придонело чекањето на камионите да се намали, но дека може уште подобро, преку намалување на контролите и бирократијата и преку зголемување на довербата меѓу институциите на трите држави.
„Бенефитите од ‘Отворен Балкан’ и меѓусебното помагање меѓу државите и народи ние го осетивме уште летоска. Како резултат на Договорот за заедничко дејствување за време на природни и други катастрофи, соседите на Северна Македонија ѝ помогнаа во интервенција на пожарите кои ја зафатија нашата земја минатото лето“,
рече тој додавајќи дека во вакви услови ние сме си природно упатени едни на други.
Тој заклучи дека со ова појасни и поаргументирани се придобивките од слободниот проток на капитал, луѓе, стоки и услуги – подобрување на конкурентноста, нови инвестиции, поголем пазар, мобилност и развој на бизнисите во регионот и подобар стандард и квалитет на живот на сите граѓани од целиот Балкан.
Ковачевски потсети дека „Отворен Балкан“, како ново, амбициозно и динамично регионално поврзување доби силна и едногласна поддршка од деловните заедници на сите земји од Западен Балкан и им се заблагодари на стопанските комори.
„Овој самит не носи уште понапред во нашата соработка. Во нашиот фокус се соработките, меѓусебните размени, отстранувањето на бариерите, доближувањето на нашите народи. Одиме понатаму со крупни чекори“,
рече тој и најави што ќе произлезе од овој самит – за заемно признавање на дипломи и научни звања издадени во високообразовните и другите овластени институции во трите земји и забрзување на постапката за создавање единствен заеднички пазар на трудот, како и промовирање на Балканот како регионална атрактивна туристичка дестинација.
„Имаме на светот да му ги понудиме дел од најубавите мориња на Медитаренот благодарение на богатството на Албанија. Планините и прочуениот селски туризам на Србија. Македонските езерски пејзажи и убавите зелени планини“,
рече Ковачевски.
Исто така, Ковачевски најави и нова соработка и во областа култура – креирање Заеднички календар на културни настани што ќе донесе поголема мобилност на публиката и ќе ја поттикне културната размена.
„Очекувам да го зголемиме бројот на фестивалски настани во регионот, што ќе значи повеќе содржина за нашите граѓани и поголема атрактивност на регионот. Очекувам еден ЕГЗИТ да го видиме во Северна Македонија и во Албанија. Очекувам седум-осминскиот македонски такт да се слуша сè почесто и во Белград и во Тирана. Очекуваме што е можно повеќе Срби и Македонци да ја посетат Тирана, европската младинска престолнина за 2022 година“,
рече тој.
Тој потсети дека ова е европеизацијата и конкретни чекори кон етаблирање на вредностите и практиките во Европската Унија, нешто што е вообичаена и нормална пракса во ЕУ врз основа на заеднички договори на нејзините земји членки.
„Нашата политичка цел е јасна и единствена – Западен Балкан мора да стане дел од Европската Унија. Местото на секоја земја од регионот е во Европската Унија. По тој пат одиме. Заедно се европеизираме“,
рече Ковачевски.
Ковачевски тука потсети на пораката што денеска се испраќа од „Отворен Балкан“:
„Од исклучителна важност е Европската Унија и земјите членки максимално одговорно да прифатат дека проширувањето на ЕУ со земјите од Западен Балкан сега веќе е и стратешко и безбедносно прашање. Интеграцијата значи заедничка посветеност за изградба на силна, стабилна и обединета Европа, како дом на демократски и цивилизациски вредности и сили. Нашата визија за Балканот во 21 век е визија за напреден регион интегриран во Европа каде мирот, стабилноста и развојот веќе никој не ги доведува во прашање. Ние дејствуваме прагматично и економски и со тоа ќе создадеме услови за големи инвестиции во нашиот регион, а тоа ќе значи повеќе работа и подобро платена работа за нашите млади. и нашите граѓани. Бараме ЕУ да го поддржи овој наш напор и да го препознае како инспирација за решавање на сопствените проблеми“,
рече Ковачевски.
На крајот, тој уште еднаш потсети дека „Отворен Балкан“ е за интеграција, за отворени можности, за слобода, за олеснување, помагање, пријателство.