Според вчерашните најави на претседателот на Собранието, тој откако ќе ја прими оставката на Ковачевски, ќе го информира претседателот на државата Стево Пендаровски за тоа, а потоа во текот на денот и тој ќе поднесе оставка. Од неговиот кабинет најавија дека со соопштение ќе информираат за следните чекори
Премиерот Димитар Ковачевски претпладнево лично во Собранието ја достави неговата оставка, со што во оставка е целата Влада до изборот на техничката влада во недела на 28 јануари.
Ковачевски во изјава за медиумите изрази убедување дека по изборите на 8 мај тој ќе ја предводи новата влада, а за техничкиот премиер Талат Џафери рече дека е искусен политичар кој има големо искуство во водењето на парламентот и оцени дека неговиот стил за водење на владата ќе биде различен, но дека државата ќе го задржи својот стратешки правец.
„Имавме неформална средба со министрите на којашто им се заблагодарив за напорната работа во овие изминати две години. Денеска, како што кажав, ќе го направам тоа што е според закон предвидено. Мојата оставка е потпишана, сега ќе ја однесам во архивата. Ќе се видиме со претседателот на Собранието, ќе му посакам успешна процедура до недела, а потоа и успешен негов избор за технички премиер. Јас дојдов со друго искуство во водење на корпорации, така што, веројатно стилот ќе биде различен, меѓутоа државата секако дека ќе го задржи својот стратешки правец, а тоа е западната ориентација, стратешкото партнерство во САД и техничката влада исто ќе се грижи за граѓаните како што ние тоа го правевме во изминатите две години. Ова е нешто што е предвидено според закон, на 9 мај повторно Владата ќе ја предводам јас и ова парламентарно мнозинство коешто ќе обезбеди полноправно членство на Република Северна Македонија во ЕУ до 2030 година“,
рече Ковачевски.
Ковачевски смета дека владата која тој ја предводел се грижела за сите граѓани.
„Јас ја имав таа одговорност и таа чест да ја водам Владата во едно исклучително време, во време на многу и меѓународни турбуленции, меѓутоа пред сè на економски турбуленции предизвикани од војната во Украина. Сметам дека се грижевме за сите. Сметам дека обезбедивме сè она што беше да ги задржиме работните места, да ја задржиме ликвидноста на компаниите и да обезбедиме приходи за најранливите категории на граѓани преку најголемите пакети на антикризни мерки коишто која било земја во регионот ги направи. Не дозволивме ценовен шок, не дозволивме рестрикции на електрична енергија. Не дозволивме енормно покачување на цените на нафтените деривати. Ја намаливме инфлацијата за шест пати од 20 на 3,5 проценти и сметам дека, како што кажав, сите министри во Владата, замениците министри, службите коишто работат во сите институции треба да бидат горди на тоа што го направија за својата држава во изминатите две години“,
рече сега веќе поранешниот премиер.
Според вчерашните најави на претседателот на Собранието, тој откако ќе ја прими оставката на Ковачевски, ќе го информира претседателот на државата Стево Пендаровски за тоа, а потоа во текот на денот и тој ќе поднесе оставка. Од неговиот Кабинет најавија дека со соопштение ќе информираат за следните чекори.
Оставката на Ковачевски е првиот формално-правен чекор кон формирање на техничка влада што треба да биде избрана на 28 јануари.