Во наредниот период ќе има дополнително намалување на цените и кај другите производи од пекарската, млекарската и од месната индустрија, што се очекува да биде од најмалку десет проценти, очекува Ковачевски
Кај некои од пекарниците веќе е регистрирано намалување на цената на белиот леб, исто така има намалување на цените на млекото кај одредени млекарници, а треба да се има предвид дека одредени продавници имаат резерви од претходно и тие се по стари цени, рече денеска премиерот Димитар Ковачевски.
Во наредниот период Ковачевски очекува дека ќе има дополнително намалување на цените и кај другите производи од пекарската, млекарската и од месната индустрија, што се очекува да биде од најмалку десет проценти.
Во обраќање на конференцијата „Економски предизвици во 2023 година: Како да го одржиме економскиот раст и ја трансформираме економијата“ во организација на Стопанската комора на Северна Македонија, Ковачевски се осврна на мерките и одлуките на Владата за ублажување на кризата и високата инфлација и истакна дека грижата на Владата и политиките за помош на граѓаните и стопанството продолжува и следната година.
„Тоа преточено во новиот буџет за 2023 година, кој е рационален и спремен да одговори на предизвиците со енергетската криза, треба да ја обезбеди потребната основа за премин кон забрзан економски раст и развој на државата , за да понатаму се постигнат и посакуваните стапки на раст од пет проценти на БДП. Буџетската каса за идната година е проектирана така да може да обезбеди стабилност, сигурност и економски раст во услови на криза“,
рече Ковачевски.
Тој додаде дека за антикризни мерки во буџетот за 2023 година се издвоени 250 милиони евра.
„Кризата сè уште трае ја менува формата и динамиката, поставува нови неизвесности и предизвици и Владата е тука да ги слушне сите предлози на деловната заедница како што ги слушаше и досега. И оваа година фокусот на Владата е да обезбеди услови на раст на инвестициите. Наша цел е домашните и странските инвестиции да бидат двигател на растот, да се зголемува извозот, да се намалува невработеноста, паралелно да растат платите и да се подобрува животниот стандард. Нашето членство во НАТО обезбедува сигурност на инвестициите, дополнително стартот на пристапните преговори во ЕУ ќе ја зголеми стабилноста, ќе се отворат нови пазари, а сето тоа значи и нови можности за компаниите“,
рече Ковачевски.
Премиерот порача дека кризата ќе се преживее и надминеме само со заедничка работа, солидарност, поддршка на најранливите категории граѓани, зачувување на работните места и задржување на ликвидноста на компаниите.
„Кога се работи напорно и има волја, нема недостижна цел, а бизнис заедницата во Владата има сериозен партнер. Владата е партнер на деловната заедница бидејќи заедничка цел ни е да создаваме подoбри услови за граѓаните, ликвидни и брзорастечки компании, подобро платени работни места, а со тоа и подобар животен стандард за сите во државата“,
рече Ковачевски.
Тој посочи дека голем број од мерките кои се реализираат се практично барања на коморите и оти Владата одговорно и навремено интервенирале со мерки за одржување на ликвидноста на компаниите, како и дека редовно ги сервисира обврските и кон стопанството и кон граѓаните.
„Само во 2022 година двата пакета антикризни мерки беа во вредност од 760 милиони евра, најголем пакет државна поддршка во регионот“,
рече Ковачевски и посочи дека лани стопанството добило поврат на ДДВ во износ од 727 милиони евра, а динамиката во тој процес ќе продолжи и во иднина.