Лидерот на Достоинство, Стојанче Ангелов, денеска изјави дека од премиерот Димитар Ковачевски и лидерот на ДУИ, Али Ахмети, е дадена недвосмислена поддршка, но и зелено светло за сериозно да биде разгледана иницијативата за обесштетување на бранителите од 2001 година
На вчерашната средба со коалициските партнери од СДСМ разговаравме за иницијативата што ја поднесовме до Владата, за да се донесе одлука за обесштетување на бранителите од 2001 година. Од страна на премиерот Димитар Ковачевски и лидерот на ДУИ, Али Ахмети, е дадена недвосмислена поддршка, но и зелено светло таа да биде сериозно разгледана, рече денеска на прес-конференција претседателот на Достоинство, Стојанче Ангелов.
Тој изрази благодарност и до лидерот на ВМРО-ДПМНЕ, Христијан Мицкоски, и до пратеникот Драган Ковачки кои пред неполн месец поднесоа предлог-законски измени за воведување симболични права за бранителите кои се бореле во 2001 година.
„На вчерашната коалициска средба, меѓу другото, разговаравме и за проблемот којшто ги мачи 15-ина семејства на загинати бранители, како и 30-ина воени инвалиди. Претходно, и од премиерот и од клучните министри имавме поддршка, со тоа што оваа иницијатива во следните денови ќе биде сериозно разгледана и се надевам на позитивно решение во разумен временски рок. Значајно е да истакнеме дека лидерот на ДУИ, Али Ахмети, е подготвен за разговори во врска со оваа наша иницијатива“,
рече Ангелов.
Ангелов посочи оти е оптимист дека оваа иницијатива ќе биде прифатена од Владата, но, како што рече, доколку Владата ја отфрли иницијативата на Достоинство, истиот ден ќе ја напуштат владината коалиција.