Според бугарскиот европратеник, резолуцијата на Бундестагот била донесена „на барање на премиерот во Скопје“ со цел да се помогне во започнувањето на преговорите за пристапување на Северна Македонија во Европската Унија. Понатаму, европратеникот од редовите на ГЕРБ иронично вели дека нема ништо лошо во тоа и во идентичен стил додава: „Нашите колеги, соседи и пријатели во Скопје не треба да се грижат за тоа дека имаат модерен идентитет, јазик и култура, но разбирам дека сакаат да покажат некаква историска доследност или историски континуитет што се разликува од бугарскиот“
По изгласувањето на резолуцијата од страна на германскиот парламент – Бундестагот, со која се дава поддршка на македонскиот идентитет и јазик, со реакција се јави европратеникот од редовите на ГЕРБ, Андреј Ковачев.
Тој преку видеообраќање, објавено на неговиот профил на Фејсбук, вели дека не слушнал за друг сличен феномен – една држава да биде толку несигурна во својот идентитет, јазик и култура што мора да моли други држави со политичка одлука на законодавно тело да ѝ ги признае јазикот, културата и идентитетот.
Инаку, германскиот Бундестаг на крајот од резолуцијата меѓу другите препораки, сумирани во 13 точки, ја повикува сојузната влада во Берлин да ја повика Бугарија да го поддржи патот на Северна Македонија кон ЕУ во рамките на компромисот договорен со Советот и да се воздржи од дополнителни услови.
Според бугарскиот европратеник, резолуцијата на Бундестагот била донесена „на барање на премиерот во Скопје“ со цел да помогне во започнувањето на преговорите за пристапување на Северна Македонија во Европската Унија.
Во текстуалниот дел од објавата на Ковачев, пак, се користи поинаков вординг во врска со иницијаторот на резолуцијата. Па така, наместо „премиерот во Скопје“, како што вели во видеообраќањето, во текстот стои дека владејачката коалиција во германскиот Бундестаг на барање на „социјалистите во Скопје доцна во четвртокот усвои резолуција за поддршка на нивните партиски пријатели од северна Македонија“.
„Проблемот, поточно чудниот феномен е што тие се молат кај друга држава со одлука во парламентот да признае дека постојат македонскиот јазик, култура и идентитет. Не сум слушнал за друг сличен феномен на нашата планета“,
вели Ковачев во видеообраќањето.
Нема ништо лошо во тоа, иронично оценува понатаму европратеникот, додавајќи во идентичен стил:
„Нашите колеги, соседи и пријатели во Скопје не треба да се грижат за тоа дека имаат модерен идентитет, јазик и култура, но разбирам дека сакаат да покажат некаква историска доследност или историски континуитет што се разликува од бугарскиот“.
Овде Ковачев ја лоцира и основата на проблемот што Бугарија го има со земјава, од каде што, како што вели, доаѓа дискриминацијата и говорот на омраза и сите проблеми што ги имаме.
„Тоа не се билатерални проблеми, тоа се проблеми поврзани со основните човекови права и европските вредности“,
вели Ковачев.
Тој ги повикува власта и опозицијата С Македонија да покажат смелост и храброст и да не го продолжуваат „моментумот од времето на Титова Југославија“, туку двете држави взаемно да си помагаат и што побрзо да бидат заедно во Европската Унија.
„Да си помагаме заедно, да бидеме заедно што побрзо во ЕУ, како што тоа го прават Романија и Молдавија, како што прави Грција со Кипар. Ние треба да сме заедно во ЕУ, а тоа може да се се случи само врз основа на пријателство, добрососедство, со спроведување на Договорот потпишан во 2017 година меѓу премиерите (Зоран) Заев и (Бојко) Борисов, како и со добра волја. Им посакувам на нашите соседи навистина да ги надминат сите пречки и да можат што побрзо да станат членка на ЕУ заедно со нас“,
вели Ковачев во своето видеообраќање.
Дополнително, во текстот од објавата се наведува уште еден момент, кој не е содржан во видеообраќањето, а тоа дека тој им се заблагодарува на своите колеги од Христијанско-демократската унија и Христијанско-социјалната унија во Бундестагот што не ја поддржаа оваа „социјалистичка резолуција и со тоа придонесоа дополнително да се усложнуваат односите меѓу двете земји“.
Инаку, европратеникот на ГЕРБ минатиот месец беше повод за заострување на на реториката меѓу Софија и Скопје откако на 6 мај не му беше дозволен влез во земјава. Во образложението за таквата одлука, од МНР посочија дека дел од петтемина бугарски државјани на кои им било забрането да влезат во земјава на 6 мај биле и лица за кои Министерството за внатрешни работи (МВР) имало сознанија оти претставуваат ризик по јавниот ред и безбедност. Сепак, од МНР додадоа дека европратеникот Ковачев не е еден од нив, но надлежните служби донеле одлука да му го забранат влезот и нему поради групата со која патувал.
Германскиот парламент – Бундестагот, со мнозинство гласови на пратениците од трите владејачки партии – Социјалдемократите, Либералите и Зелените вчера вечер ја изгласа резолуцијата со која се дава поддршка на македонскиот идентитет, јазик и култура на патот на земјава кон членство во Европската Унија.
Резолуцијата не доби поддршка од опозициските партии, вклучително и од конзервативната Христијанско-демократска унија/Христијанско-социјална унија (ЦДУ/ЦСУ) на поранешната канцеларка Ангела Меркел.
Инаку, ЦДУ и баварската ЦСУ идеолошки се сестрински партија на ВМРО-ДПМНЕ.
Предлог-резолуцијата пред пратениците ја претстави државната секретарка за Европа во германското Министерство за надворешни работи, Ана Лирман, која е од редовите на Зелените. Таа рече дека со резолуцијата се оддава длабока почит на македонскиот идентитет, јазик, култура и историја. Лирман воедно најави дека наскоро повторно ќе ја посети земјава заедно со нејзините колеги од Франција и од Полска за да ги охрабрат уставните измени чие донесување е услов за земјава да го продолжи својот пат кон членство во Европската Унија.
Двајцата пратеници од десничарските ЦДУ и ЦСУ, Кристоф Плос и Тобијас Винклер, кои учествуваа во дебатата, настапија со критики кон владејачкото мнозинство, бидејќи, како што рекоа, со резолуцијата ја издвојува Северна Македонија од останатите земји од Западен Балкан, спротивно на политиката што претходно ја спроведувала поранешната германска канцеларка Ангела Меркел
На критиките на опозицијата одговорија пратеникот на владејачките социјалдемократи (СПД) Јосип Јуратовиќ и неговиот колега од редовите на либералите Томас Хакер, истакнувајќи дека секоја земја кандидат за членство во Европската Унија секогаш се вреднувала поединечно, а не го група. Јуратовиќ воедно побара од конзервативната ЦДУ да влијае на нивната сестринска партија во земјава ВМРО-ДПМНЕ за уставните измени.