Костадиновски очекува предметот во врска со Законот за употреба на јазиците да биде решен следната година

Во врска со одлуката на Управниот суд за судијата известител за Законот за јазиците и дали се сомнева на политичка позадина, претседателот на Уставниот суд вели дека тоа отвора простор за сомнеж

Претседателот на Уставниот суд, Дарко Костадиновски, вели дека предметот за Законот за употреба на јазиците ќе биде решен во текот на следната година. Тој вели оти никој не треба да гледа на овој процес како на опасност, додавајќи дека со тоа се прави усогласување со највисокиот правен акт во државата.

Костадиновски појасни дека улогата на Уставниот суд е да дејствува како „пријател“ на правниот систем, укажувајќи на неусогласеностите кои пратениците треба да ги преточат во законски решенија.

„Наша должност е да одговориме и ние како Уставен суд, кога одлучуваме никој не треба да гледа на нашите одлуки како на некоја закана или на некакво давање или одземање права. На нашите одлуки сите државни органи треба да гледаат како пријател, да ја вратиме состојбата на Уставност, да укажеме каде има неусогласеност со Уставот, таа неусогласеност пратениците да ја преточат во законски решенија“,

рече Костадиновски на денешната годишна прес-конференција. 

Според него, од крајниот резултат за кој вели дека ќе биде многу подобар закон отколку тој што го имаме во овој моменти кој ќе биде усогласен со Уставот, бенефит ќе имаат граѓаните.

Претседателот на Судот образложи оти овој предмет го прати „неверојатен сплет на околности“ и дека за жал две подготвителни седници биле одложени од објективни причини.

Уставен за случајот со судијката Дуковска: Предизвикан е правен преседан, се одложува подготвителната седница за Законот за јазиците

Првото одложување се случило само неколку дена по пожарот во „Пулс“ во Кочани, а второто е одлука на Управниот суд со која бил отстранет судијата известител по предметот и оти во такви околности се постапува по актот на судот.

„Во такви околности предметот оди кај друг судија известител, тој има рок од шест месеци. Рокот истече минатиот месец, судијата известител, побара уште еден месец за да го доработи“,

рече Костадиновски.

Костадиновски очекува предметот да го добие во текот на јануари, по што ќе инсистира на одржување на подготвителна седница.

Во врска со одлуката на Управниот суд за судијата известител за Законот за јазиците и дали се сомнева на политичка позадина, претседателот на Уставниот суд вели дека тоа отвора простор за сомнеж.

„Оваа одлука Управниот суд да ја донесеше во рок од три, седум, 15 или 30 дена по изборот, никој немаше да зборува ништо. Но, по две години, природно е да се сомневаме. Здравата логика налага да имаме основ да се сомневаме“,

изјави тој.

Претседателот на Уставниот суд вели дека мора да постои судска инстанца која ги оценува одлуките на државните органи бидејќи,како што рече, обратното „би не свело на султанат“.

Тој не сакаше да ја коментира суштината на пресудата на Управниот суд со која беше изземен судија известител, но повтори дека целиот процес го следи „чуден сплет на околности“.

Костадиновски потсети дека уште пред неколку месеци јавно го повикал законодавецот веднаш да ја поправи таа законска празнина.