Според Харадинај, за помалку од три години на власт, косовскиот премиер Курти и претседателката на земјата, Вјоса Османи, ги поништиле успесите на Косово и ја вратиле земјата десет години назад. Харадинај додаде дека исклучувањето на Косово од „Европски бранител 2023“ е „аларм за националната безбедност“ на Косово
Тензичната состојба на северот на Косово последниве денови, ги вжешти политичките односи во земјата. Лидерот на опозицијата Рамуш Харадинај од Алијансата за иднината на Косово побара оставка од косовскиот премиер Албин Курти, објави „КосоваПрес“, повикувајќи се на објава на Харадинај на Фејсбук.
Според Харадинај, за помалку од три години на власт, косовскиот премиер Курти и претседателката на земјата Вјоса Османи, ги поништиле успесите на Косово и ја вратиле земјата десет години назад. Харадинај додаде дека исклучувањето на Косово од „Европски бранител 2023“ („Defender Europe 2023“) е „аларм за националната безбедност“ на Косово и истакна дека „треба да си многу кратковид за да станеш непријател на целиот демократски свет во толку деликатно време“.
Опозициската Демократска партија на Косово (ДПК) изрази загриженост поради неодамнешните настани во северно Косово, кои ја ставија земјата во опасна конфронтација со нејзините сојузници и особено со САД. ДПК побара од владата на Република Косово да го преиспита и да го промени својот пристап.
Со оглед на тежината и сложеноста на ситуацијата, како и тензијата што настана во северните општини од земјата, раководството на ДПК апелира до претседателот и до премиерот на Косово итно да се свика Советот за безбедност.
„Раководството на Демократската партија на Косово изразува длабоко разочарување од некоординираните акции на Владата на Косово со стратешките сојузници на нашата земја, кои веќе почнаа да водат кон директни казни, со оглед на тоа дека Косово беше исклучено од најголемата меѓународна вежба на НАТО на Балканот ‘Европски бранител 2023’. Ова исклучување е конкретен знак за влошување на односите на Косово со САД и НАТО и е предупредување за други последици доколку владата на Република Косово не почне да се однесува одговорно“,
рече лидерот на ДПК, Мемли Красничи, во објава на социјалните мрежи.
Красничи изрази загриженост за општата насока што Косово ја презема под водство на Албин Курти. Тој изрази поддршка за новоизбраните градоначалници на Зубин Поток и Звечан, кои се од редовите на ДПК и го осуди насилството на „криминалните групи“ врз војската на КФОР, косовската полиција и претставниците на медиумите при извршувањето на нивните службени должности.
Косовскиот премиер одговори на обвинувањата на опозицијата велејќи дека владата ќе стори сè што е во нејзина моќ, но дека тој самиот нема да ја предаде „Демократската Република (Косово) на фашистичката милиција“. Курти ова го изјави денеска во интервју за Си-ен-ен, додавајќи дека со меѓународните партнери на Косово разговарал за ситуацијата на северот на земјата.
„Сите меѓународни фактори ги признаа изборите што се одржаа на 23 април. Кога се признати процесот и резултатите, градоначалниците треба да одат во општините. Кој друг да биде таму ако не градоначалниците. Тесно соработуваме со меѓународните актери, особено со САД и ЕУ, кои ги сметаме за многу вредни сојузници и партнери. Ќе дадеме сè од себе. Но, нема да ја предадам Демократската Република (Косово) на фашистичката милиција“,
изјави Курти за Си-ен-ен.