Кондарко информира дека во текот на утрешниот ден, кој е ден за гласање, ДИК во три наврати ќе известува преку соопштенија за текот и излезеноста на гласањето. Резултатите од утрешното гласање на болните и немоќните, на затворениците и лицата во старските домови не се бројат и не се објавуваат утре, туку заедно со другите резултати в недела
Претседателот на Државната изборна комисија (ДИК), Борис Кондарко, денеска ги повика учесниците на изборите и медиумите да го почитуваат изборниот молк пред вториот круг на локалните избори, кој започнува вечерва на полноќ и апелираше сите граѓани да го остварат своето право на глас.
„Согласно изборните правила, да го почитуваат изборниот молк, после 24 часот вечерва, во текот на утрешниот ден кога гласаат болните и изнемоштени во своите домови, лицата во казнено-поправни домови и во старските домови. Исто така, сакаме да апелираме сите граѓани да можат да слободно да го остварат своето право на глас, да излезат и да гласаат. Гласањето е лично и тајно, така што во согласност со сите насоки, правила и процедури на ДИК да можат да си го остварат своето демократско право на глас“,
рече Кондарко на денешната седница на ДИК.
Тој апелира и до сите изборни органи, до избирачките изборни комисии и до општинските изборни комисии да ги почитуваат сите законски процедури и сите упатства во врска со постапката на гласање, и во врска со утврдување на резултатите во избирачките места.
Кондарко информира дека во текот на утрешниот ден, кој е ден за гласање, ДИК во три наврати ќе известува преку соопштенија за текот и излезеноста на гласањето. Резултатите од утрешното гласање на болните и немоќните, на затворениците и лицата во старските домови не се бројат и не се објавуваат утре, туку заедно со другите резултати в недела.
В недела на 2 ноември на секои два часа ДИК ќе излегува со податоци за отворањето на гласачките места, за текот на гласањето и за одѕивот од гласањето. После 19 часот ќе се одржи прес-конференција за состојбата со излезеноста до 18 и 30 часот, додека првичните неофицијални резултати што ДИК ќе ги добива сукцесивно од секое избирачко место по електронски пат веднаш по потпишувањето на записниците од избирачките места, исто како за првиот круг, ќе се објавуваат веднаш штом ќе пристигнат. Кондарко рече дека нивните очекувања се оти некаде околу 23 часот ќе биде одржана и завршната прес-конференција на која што ќе бидат објавени поединечно сите резултати од гласањето во вториот круг од изборите.
Првичните официјални резултати од гласањето во вториот круг ќе бидат објавени в понеделник попладне, кога ќе почнат да течат и роковите за евентуални приговори.