Министерот за финансии на почетокот на расправата го презентираше ребалансот и рече дека има две основни цели: прво, да се одржи макроекономската стабилност и второ, да се поддржи економијата за враќање во претпандемиското ниво, како и одржување на социјалната сигурност на граѓаните
Во собраниската Комисија за финансирање и буџет почна расправата за ребалансот на Буџетот за 2022 година кој за пратениците од владејачкото мнозинство овозможува продолжување на досегашните мерки и политики за справување со последиците од светската економска криза, додека за опозицијата, пак, е доказ дека државата е на раб од банкрот.
Во комисиската дебата пратениците од ВМРО-ДПМНЕ нагласија дека државата никогаш немала повисока стапка на јавен долг и оти имаме највисока инфлација во последните 20-тина година, огромен недостаток на домашно производство на електрична енергија, најнизок економски раст во регионот, но, и како што нагласија, најкорумпирана власт која за пет години успеала да уништи сиот институционален капацитет кој се создавал во минатото.
„Со оваа власт на СДСМ и ДУИ кризата ќе се продлабочува бидејќи тие се извор на кризи. Со ребалансот ништо нема да се промени на подобро, туку Македонија ќе продолжи да тоне уште повеќе“,
рече Бојан Стојановски од ВМРО-ДПМНЕ.
За пратениците од СДСМ, пак, преку овој ребаланс со одговорен пристап се остварува заштеда на сериозни средства кои ќе се искористат за директна помош за граѓаните и стопанството.
Се крати секаде каде тоа е можно, рече пратеникот Диме Велковски од СДСМ, за да се супституираат ценовните шокови кои ги има во целиот свет.
Претходно, на почетокот на седницата на Комисијата за финансирање и буџет, министерот за финансии Фатмир Бесими истакна дека со предлог-ребалансот на Буџетот треба да се постигнат две основни цели – прво, да се одржи макроекономската стабилност, што, вели, е од суштинско значење за понатамошниот раст и развој на секоја економија и второ, да се поддржи економијата за враќање во претпандемиското ниво, како и одржување на социјалната сигурност на граѓаните.
Со ребалансот на Буџетот, вкупните приходи во државната каса се планирани на ниво од 245,8 милијарди денари и се за околу 6,9 милијарди денари или 2,9 проценти повисоки во однос на иницијалните проекции. Износот на вкупните расходи, пак, е 288,5 милијарди денари или за околу 161,1 милијарда денари (5,9 проценти) повеќе во однос на првичните проекции со планот за 2022 година. Капиталните расходи се планирани на ниво од 32,2 милијарди денари и се за околу шест милијарди денари пониски во однос на планот за 2022 година, но од власта најавуваат дека ќе продолжат проектите за изградба на патишта, железници, гасоводи …
Економскиот раст е проектиран на 3,2 проценти што е намалување за 1,4 процентни поени во однос на макроекономските проекции кога се креираше Буџетот, а стапката на инфлација е проектирана на 7,2 проценти.
Дефицитот е планиран на ниво од 42,7 милијарди денари односно 5,3 проценти од БДП што е за 9,1 процент повеќе во однос на првичниот буџет. Дефицитот и отплатата на надворешниот и на домашниот долг, како што беше посочено на презентацијата на ребалансот, ќе се финансираат преку задолжување од меѓународниот и домашниот пазар.
Во ребалансот на Буџетот предвидени се околу 70 милиони евра за антикризни мерки кои, како што најавуваа владини претставници во изминатиов период, ќе бидат таргетирани кон оние на кои им се најпотребни.