Денеска градоначалникот на Тетово, Биљал Касами ја повика Македонската православна црква-Охридска Архиепископија (МПЦ-ОА) да биде тргнат крстот од планината
Комисијата за односи со верските заедници денеска излезе со став поради поставениот 15-метарски крст во манастирската црква Свети „Наум Охридски Чудотворец“ на Попова Шапка, откако во текот на вчерашниот ден имаше бура од реакции од политичкиот блок на Албанците, како и од градоначалникот на Тетово и мнозинството на Советот на општина Тетово.
Од Комисијата повикаа на внимателност и воздржаност од граѓаните, но и упатија за неселективна и принципиелна поставеност на општина Тетово.
„Комисијата за односи со верските заедници повикува на внимателност и воздржаност од граѓаните, како и мудрост во раководењето со институциите од оние кои добиле мандат од граѓаните да градат хармонично мултикултурно општество, кое само по себе не подразбира исклучивост на ниту една култура, туку нивна коегзистенција и почитување на различностите“,
се наведува во соопштението.
Оттаму посочуваат дека Комисијата ќе остане посветена во одржување на добрите меѓуверски односи.
„Затоа, имајќи ја сензитивноста во предвид апелираме политиката и на неа сродните интереси да не се вмешуваат во меѓучовековите односи. Во однос на изградбата на профани или религиозни објекти, како и поставување на нивни обележја на туристичкиот центар Попова Шапка упатуваме на неселективна и принципиелна поставеност на општина Тетово“,
порачуваат од Комисијата.
Вчера се одржа вонредна седница на Советот на општина Тетово, со поставена само само една точка на дневниот ред, за „Информација за поставување крст на Попова Шапка“.
Претходно ДУИ жестоко реагираше на поставувањето на 15-метарски крст во Туристичкиот центар „Попова Шапка“ и бара одговорност од општина Тетово што го дозволила овој скандал.
„Дали поставувањето на овој крст е нешто претходно договорено меѓу Беса на Билал Касами и ВМРО-ДПМНЕ, услуга чувана во тајност од граѓаните за помошта што ВМРО и ја понуди на Беса на локалните избори за општина Тетово? Нереакција на општината и тенденцијата сето ова да помине во молк, доволно говори за договорот меѓу ВМРО и Беса. Но, тетовчани не молчат, нема да молчиме ниту против овој скандалозен пазар! Групата советници на ДУИ во општина Тетово веќе побараа појаснување по ова прашање од првиот човек на општина Тетово,
се вели во соопштението на ДУИ.
Денеска градоначалникот на Тетово, Биљал Касами ја повика Македонската православна црква-Охридска Архиепископија (МПЦ-ОА) да биде тргнат крстот од планината.