Државата пред две недели остана без народен правобранител бидејќи претходниот, Насер Зибери, на 12 јули замина во пензија
Собраниската Комисија за прашања на изборите и именувањата денеска ја утврди одлуката Фатон Сељами да биде избран за нов народен правобранител, на местото на Насер Зибер, кој замина во пензија. Комисијата предлог-одлуката ќе ја проследи до Собранието.
Претседателот на Комисијата, Ѓорѓија Сајкоски, информира дека на огласот за избор на народен правобранител биле пријавени 17 кандидати.
Предлагачот на Фатон Сељами, пратеникот Беким Ќоку од коалицијата ВЛЕН, изложувајќи ја својата биографија пред членовите на Комисијата, посочи дека Сељами е од Тетово, оженет и татко на три деца, дека има завршено Правен факултет на Универзитетот во Тетово и постдипломски студии на Универзитетот на Југоисточна Европа. Тој нагласи дека Сељами имал долго работно искуство во областа на одбраната и промовирањето на човековите права. Работел во Агенцијата за информации, до 2008 работел во Комисијата за заштита на правата за слободен пристап на информации од јавен карактер. Од октомври 2008 година бил вработен во канцеларијата на народниот правобранител во Скопје. Во 2018 година Сељами бил именуван за генерален секретар во Министерството за правда и од 2020 е вработен во регионалната единица на Министерството за правда во Тетово. Од 2023 година работел како раководител на одделение за политички систем во Министерството за правда. Ќоку нагласи дека Сељами ги исполнува сите услови и критериуми кои се поврзани со функцијата Народен правобранител и побара поддршка да се изгласа неговиот предлог.
Државата пред две недели остана без народен правобранител бидејќи претходниот, Насер Зибери, на 12 јули замина во пензија.
Пратеничката на СДСМ, Сања Лукаревска, нагласи дека во иднина, за вакви сензитивни клучни функции би требало порано да ги детерминираат и детектираат овие состојби и да има еден транспарентен, навремен процес за да бидат информирани и граѓаните и пратениците.
„Се знаело, стапувањето на условите за пензија се на 12 јули и сме можеле барем месец дена пред тоа да ја започнеме целата процедура и врз основа на тоа да не влеземе во еден цајтнот и да останеме без народен правобранител. Независно дали согласно законот имаме обврска или немаме обврска за интервју на овие 17 кандидати, сепак за јавноста би било можеби многу потранспарентно и посоодветно ако имавме една јавна расправа преку нивно преставување за да ја видиме и визијата и мисијата и нивната рамка и стратегија како мислат да функционираат овие кандидати. Сметам дека во моментов немаме соодветна транспарентност, туку преку трупа ја истеравме цела оваа процедура. Во иднина за вакви сензитивни клучни функции би требало порано да ги детерминираме и детектираме сите овие состојби и да имаме еден транспарентен, навремен процес за да бидат информирани и граѓаните, но и ние како пратеници“,
рече Лукаревска.
Сајкоски нагласи дека Собранието не било известено дека народниот правобранител исполнува услови за старосна пензија и затоа веднаш по добивањето на информацијата дека му истекува мандатот, ги вложиле сите напори за да се отпочне постапка за избор на народниот правобранител.
Согласно член 5 од Законот за Народен правобранител, тој се избира за време од осум години со право на уште еден избор. Согласно член 9 став 1 од Законот за Народниот правобранител, функцијата народен правобранител престанува кога тоа сам го бара, е избран или именуван на друга јавна функција или ги исполнува условите за старосна пензија.
Согласно член 6 став 1 од Законот за Народен правобранител, може да биде избрано лице за народен правобранител кое ги исполнува општите услови определени со закон за основање на работен однос – да е државјанин на Република Македонија, да е дипломиран правник кој има работно искуство над 9 години на правни работи и лице чија активност е докажана во областа на заштита на правата на граѓанинот и ужива углед за вршење на функцијата народен правобранител.