Колумбијската Управа за борба против наркотици за време на рутинска проверка во пристаништето Буенавентура открила контејнер во кој се наоѓал еден тон кокаин. Tоварот бил наменет за балканскиот наркокартел, а крајната дестинација на бродот била Бугарија.
Кучиња трагачи на колумбиската полиција успеале да ја откријат психоактивната супстанција во пратка со крзно и кожа, пренесе колумбиското радио caracol.com.co.
Полицајците детално ја прегледале товарената стока и пронашле пластични фолии со бела прашкаста материја за која по тестирањето било утврдено дека е кокаин. Пратката тежела еден тон.
Според прелиминарната истрага кокаинот бил наменет за европскиот картел „Балкан”. Тој потоа би се дистрибуирал во западните земји, како Италија, Франција и Германија. Цената која би се постигнала по неговата продажба, според проценките изнесува околу 75 милиони долари.