Претседателот на Советот на јавни обвинители Ацо Колевски вели дека за денешниот избор на обвинители во ОЈО за гонење организиран криминал и корупција и во Вишото јавно обвинителство, никој од членовите на Советот не кажал дека му е вршено некакво политичко влијание.
Тој вели дека тие како членови ги усогласувале мислења, но за надворешен притисок нема информации.
„Политички ставови и мислења воопшто не беа апсолвирани, ниту некој од советот кажал дека му било вршено влијание, евентуално од политички партии. Еве, лично за мене можам да кажам дека никој не ми изврши никакво влијание. Од самиот избор, како што гледате, голем број од членовите им дадоа предност на кандидатите што имаат поголем стаж како јавни обвинители во јавните обвинителства“,
изјави Колевски.
На прашање како го коментира тоа што вчера во јавноста излезе информација дека обвинителката Фатиме Фетаи има поддршка од владејачката партија за да биде избрана за виша обвинителка, тој одговори дека Советот нема такви информации. Но, нагласи оти во составот на Советот има и членови кои не се обвинители, а ги делегира Собранието.
„Советот не е запознаен дека ја номинира некоја политичка партија, но имаше усогласување помеѓу членовите околу кандидатите. Пред сè, моја цел како претседател беше да бидат избрани сите кандидати за кои се предвидени места во огласот. Го знаете и принципот на составот на самиот Совет. Четворица членови ги делегира Собранието, шест се од редот на јавните обвинители во јавните обвинителства, а член по функција е државниот јавен обвинител. Така што не е само во рацете на јавните обвинители донесувањето на одлуката, туку по законот се делегираат и луѓе од страна кои не се јавни обвинители и кои полноправно учествуваат во изборот“,
рече Колевски.
Тој е задоволен од денешниот избор и смета дека седницата поминала во најдобар ред.
На огласот за по 5 места во ОЈО за гонење организиран криминал и корупција и во Вишото јавно обвинителство-Скопје имаше пријавено 14, односно 32 кандидати.
Од нив за обвинители за гонење организиран криминал и корупција беа избрани: Лиле Стефанова, Артан Ајро, Трајче Пеливанов, Наташа Поп Трајкова и Катерина Коларевиќ.
А, виши обвинители станаа: Фатиме Фетаи, Бурим Рустеми, Сашо Рајчев, Наум Пановски и Снежана Бундалевска-Георгиевска.
Детали за изборот на обвинители и кои обвинители отпаднаа од трката, прочитајте во извештаите во продолжение: