Единствениот излез е сите да признаеме дека Бугарија има свое читање на историјата, што е различно од толкувањето во Република Северна Македонија. Ова не значи дека бугарското гледиште е погрешно, но сигурно не значи и дека Бугарија може да побара од својот сосед да прифати бугарско толкување на историјата, порача австрискиот аналитичар и основач на Европската иницијатива за стабилност во интервју за бугарското национално радио
Република Северна Македонија е единствената земја за која Европската комисија е категорична дека може да започне преговори. Ако земјата за која ЕУ верува дека е најдобро подготвена да го започне преговарачкиот процес повторно е блокирана поради билатерални проблеми, тогаш целиот регион ќе страда, оценува австрискиот политички аналитичар и основач на Европската иницијатива за стабилност, Гералд Кнаус.
„Колку е опасно кога политичарите во регионот ќе престанат да веруваат во европската перспектива може да се види на друго место, источно од ЕУ, каде се водат војни и каде националистите тврдат дека ЕУ е ’фатаморгана‘“,
вели Кнаус во интервју за бугарското национално радио.
Кнаус нагласува дека ако Бугарија инсистира Република Северна Македонија да го прифати бугарското толкување на историјата во последните 100-150 години, треба да знае дека тоа е „изгубена работа“. А, ако тоа навистина стане услов за почеток на преговори, тогаш нема да има преговори.
Според него, владата во Скопје има само една опција – и покрај блокадата, да продолжи со реформите, да продолжи со соработката со ЕУ за да се приближи до членството. Во спротивно, земјата ќе западне во политичка безнадежност.
„Бугарија нема да добие ништо друго освен непотребна напнатост со соседот и недоразбирање од страна на европските партнери. Нема победници во овој спор. Нема македонска влада што признава дека идентитетот на нејзиниот народ е комунистичка измислица“,
истакнува Кнаус.
За тоа дали Германија како претседавач со ЕУ и најмоќна земја во ЕУ, може да помогне да се решат отворените историски прашања, тој смета дека Берлин е од помош, но не со притисоци.
„Единствениот излез е сите да признаеме дека Бугарија има свое читање на историјата, што е различно од толкувањето во Република Северна Македонија. Ова не значи дека бугарското гледиште е погрешно или невистинито. Ниту, пак, дека Бугарија треба повторно да ја пишува својата историја. Но, тоа сигурно значи дека Бугарија не може да побара од својот сосед да прифати бугарско толкување на историјата. Актуелната македонска влада е најдобриот можен партнер за Бугарија. Обратната страна на медалот е намерната и бесцелна манипулација со историјата што ја видовме во времето на Никола Груевски“,
вели Кнаус.
Компромисот, според него, треба да се бара во соработката на сите полиња и повеќе контакти меѓу луѓето од двете страни на границата.
„Бугарија може да ја продлабочи размената на студенти со Република Северна Македонија. Како економски посилна земја, може да создаде стипендии за студенти и можности за контакти меѓу луѓето. Може да има промена во ставовите, но секако не под притисок. Како услов за почеток на преговори со ЕУ, ова барање е крајно несоодветно. Ова може да стане сериозен проблем за сите земји во Југоисточна Европа. Последиците се национализам, политичка и економска нестабилност на целиот регион“,
оценува политичкиот аналитичар и основач на Европската иницијатива за стабилност“, Гералд Кнаус.
*Поврзани вести:
Радев бара во преговарачката рамка за С Македонија да има посебно поглавје за добрососедство