Министерството за трговија на Кина истовремено ги повика САД да ги повлечат царините и разликите со своите трговски партнери да ги решаваат преку диајлог
По реакциите на Европската Унија, и Кина најави дека ќе возврати со контрамерки на новите царини што вчера ги објави американскиот претседател Доналд Трамп како и дел од неговата радикална ревизија на американската глобална трговска политика, пренесе Си-ен-ен.
Со новиот сет реципрочни тарифи на Трамп, царините за сите кинески производи што се увезуваат во Соединетите Држави, кумулативно ќе изнесуваат 54 отсто, ако се земе предвид дека САД веќе ги тарифираат производите со Кина со стапка од 20 отсто.
Според Си-ен-ен, ваквиот потег е на пат да предизвика големо ресетирање на односите и ескалација на трговската војна меѓу двете најголеми светски економии.
„Кина цврсто се противи на ова и решително ќе преземе контрамерки за да ги заштити своите права и интереси“,
се вели во соопштението на кинеското Министерство за трговија објавено денеска.
Потегот на американскиот претседател, со кој се менуваат правилата во меѓународната трговија, кинеското министерство за трговија ги оценува како „еднострано малтретирање“ и истовремено ги повика САД да ги повлечат царините и разликите со своите трговски партнери да ги решаваат преку дијалог.
„САД ги наметнува таканаречените ‘реципрочни тарифи’ врз основа на субјективни и еднострани проценки, што не е во согласност со меѓународните трговски правила и сериозно им штети на легитимните права и интереси на релевантните страни“,
се вели во соопштението на министерството.
Американскиот претседател вчера објави 34 отсто царини за сите кинески производи кои се увезуваат во САД, кои, како што пишува Си-ен-ен, се додаваат на постоечките царини од 20 отсто.
Имено, откако се врати на власт во јануари, администрацијата на Трамп почна да наплаќа две транши од по 10 отсто дополнителни давачки за сите увезени производи од Кина. Белата куќа царините ги правдаше како неопходност во нејзините напори за запирање на протокот на илегален фентанил (опијат) од земјата во САД.
Трамп ги објави мерките за време на обраќањето во „Градината на розите“ во Белата куќа, држејќи голема табела со наслов „реципрочни тарифи“, на која се прикажани царините што другите земји им ги наметнуваат на САД во споредба со американските царини за нив.
Тој особено ги издвои Кина и Европската Унија, велејќи дека Кина со години ги искористува САД преку нефер трговски практики и оти „сега ќе се заштитиме“.
Во табелите што ги објави Трамп може да се види дека мерките што ги воведува за Кина се 34 отсто, а за Европската Унија тие се 20 отсто.
За да ги прескокнат постоечките царини, како што наведува Си-ен-ен, некои кинески компании го префрлија производството во други азиски земји. Но, новите царини на Трамп за другите азиски нации објавени вчера ќе ѝ наштетат и на Кина.
Така, на пример, Виетнам ќе се соочи со давачки од 46 отсто, а за стоките од Камбоџа се предвидуваат највисоки царини од 49 отсто.
„Имам голема почит кон претседателот на Кина Си (Ѓинпинг), голема почит кон Кина, но тие нè искористуваа. Тие точно разбираат што се случува и… ќе се борат“,
рече Трамп за време на неговото речиси едночасовно обраќање.
Пекинг реагираше брзо, но умерено на претходните сетови царини наметнати од администрацијата на Трамп оваа година.
Контрамерките вклучуваа давачки од 10 отсто или 15 отсто за одредени видови гориво, како и земјоделски производи како соја, пченица и пилешко.
Пекинг, исто така, го заостри пакетот со мерки за контрола на извозот, вклучително и на критичните минерали, и ги таргетираше компаниите и секторите што може да ги користи за да изврши притисок врз американските фирми и интереси.
Царините од 54 отсто што Трамп ги наметна на Кина се повисоки од она што го очекуваа многу аналитичари и би можеле суштински да ги преобликуваат односите меѓу двете економии, чија трговска размена во 2024 година изнесувала 582,4 милијарди долари, наведува Си-ен-ен.
Претседателката на Европската комисија, Урсула фон дер Лајен, во видеообраќање на повеќе јазици – англиски, германски и француски, ги коментираше новите царини што ги воведе американскиот претседател Доналд Трамп.
Според неа, американските трговски мерки претставуваат тежок удар за светската економија и истакна дека Европската Унија подготвува контрамерки доколку не успеат преговорите.