Ванг генерално се обиде да го прикаже Пекинг како противтежа на администрацијата на американскиот претседател Доналд Трамп, која се закани со царини за стоки увезени од Европа
Кинескиот министер за надворешни работи Ванг Ји ја предупреди својата европска колешка Каја Калас за опасноста од конфронтација, се наведува во соопштението од неговото министерство објавено денеска, додека Пекинг се обидува да се претстави како стабилна противтежа на Вашингтон.
„Кина и Европската Унија не треба да се сметаат за соперници поради нивните разлики, ниту да бараат конфронтација поради нивните несогласувања“,
изјави вчера Ванг Ји на состанокот во Брисел со шефицата на европската дипломатија.
Калас вчера изјави дека Пекинг треба да престане да ја загрозува европската безбедност, наведувајќи ги кибернападите, мешањето во демократските процеси и нефер трговските практики.
„Европа се соочува со неколку предизвици од кои ниту еден во минатото, сегашноста или иднината не бил предизвикан од Кина“,
рече Ванг Ји.
Ванг генерално се обиде да го прикаже Пекинг како противтежа на администрацијата на американскиот претседател Доналд Трамп, која се закани со царини за стоки увезени од Европа.
„Патот што го избраа Соединетите Американски Држави не треба да се прикажува како одраз на Кина. Кина не е како Соединетите Американски Држави“,
рече тој.
Двете страни разговараа и за други прашања како што се Украина, израелско-палестинскиот конфликт и нуклеарната програма на Иран, се вели во соопштението на кинеското министерство за надворешни работи.
Пекинг и Брисел мора да покажат меѓусебно почитување, посочи Ванг, додавајќи дека Европа треба да промовира поактивна и попрагматична политика кон Кина.
Ванг вчера се сретна и со претседателката на Европската комисија, Урсула фон дер Лајен, и со белгискиот министер за надворешни работи Максим Прево.
„Кина и ЕУ мора да ги поддржат мултилатерализмот и слободната трговија и да работат заедно за справување со глобалните предизвици како што се климатските промени“,
ѝ рече Ванг на претседателката на ЕК.
Ванг Ји ќе ги посети Германија и Франција пред самитот ЕУ–Кина, на кој ќе учествуваат кинескиот претседател Си Ѓинпинг и неколку високи европски претставници.