„Што добиваат граѓаните? Добиваат нова компанија која ќе нуди мобилни услуги и компанија која сум сигурен дека ќе влијае позитивно во намалување на цените на услугите што мобилните оператори им ги нудат за граѓаните во Македонија“, порача премиерот
Премиерот Христијан Мицкоски информира дека на маргините на Светскиот економски форум во Давос се сретнал со сопственикот на унгарската компанија „Фор-ај-џи“ (4iG), чија фирма „Оне Македонија телекомуникации“ неодамна беше избрана за најповолен понудувач на тендерот за избор на трет мобилен оператор во земјава.
Сопственикот на „Фор ај џи“ го информирал Мицкоски дека во следниот период ќе инвестира повеќе од 100 милиони евра во развој на третиот мобилен оператор во Македонија.
„Разговаравме за неговите планови откако, нормално, ги уплати средствата што се потреби за добивање на лиценцата. Што добиваат граѓаните? Добиваат нова компанија која ќе нуди мобилни услуги и компанија која сум сигурен дека ќе влијае позитивно во намалување на цените на услугите што мобилните оператори им ги нудат за граѓаните во Македонија“,
порача Мицкоски по средбата.
Агенцијата за електронски комуникации (AEK) пред десетина дена донесе одлука дека „Оне Македонија телекомуникации“ на унгарската телеком-компанија „Фор-ај-џи“ (4iG) е најповолен понудувач на тендерот за избор на трет мобилен оператор. Откако компанијата ќе го изврши еднократниот надомест за трите фреквенциски опсези што се доделуваа со тендерот, ќе добие одобрение и теоретски ќе може веднаш да започне со работа користејќи пристап преку мрежите на постојните оператори, додека не изгради сопствена инфраструктура.