Начелниот став на партијата до овој момент е дека за секоја општина ќе прават различна стратегија во делот на коалицирањето. Во оваа смисла, лидерот Венко Филипче вели дека е отворен за сите можни коалициски комбинаторики кои ќе донесат бенефит за граѓаните
Во втората половина на април ќе биде познато името на кандидатот за градоначалник на Скопје од редовите на СДСМ за локалните избори во октомври годинава, информира вечерва партискиот претседател Венко Филипче во емисијата „Само интервју“ на Канал 5.
„До 15 или 20 март ќе ја завршиме селекцијата на кандидатите коишто ќе одат на анкети. Некаде до средината на април мислам дека огромен процент од кандидатите веќе ќе бидат познати и тие ќе ги преземат обврските за спроведување на своја сопствена промоција, со поддршка на централната партија. Ова ќе биде временската динамика којашто ќе одговара и за кандидатите за градоначалници и за членови на советничките листи. Во втората половина на април веројатно ќе биде познат нашиот кандидат за градоначалник или градоначалничка на Скопје“,
изјави Филипче.
Начелниот став на партијата до овој момент е дека за секоја општина ќе прават различна стратегија во делот на коалицирањето. Во оваа смисла, Филипче вели дека не се исклучува можноста за поддршка на независни кандидати со кои партијата споделува исти вредности и политики.
Прашан за можна коалиција со ВМРО-ДПМНЕ во некои општини на локални избори, Филипче вели дека е отворен за сите можни коалициски комбинаторики кои ќе донесат бенефит за граѓаните.
„Не сме имале разговори, ниту пак средби на тоа ниво, и покрај тоа што има одредени повици од страна на премиерот, од негови коалициски партнери и има одговор и од наша страна. Сметаме дека постојат ситуации во коишто е потребно да се седне и во парламентот да се разговара за теми од национален интерес. Ние таква комуникација за соработка на локално ниво досега не сме имале. Јас сум апсолутно отворен за буквално сите можни коалициски комбинаторики, кои ќе донесат бенефит за граѓаните“,
вели лидерот на СДСМ.
Прашан дали СДСМ и натаму е отворен за соработка со ДУИ, Филипче вели дека немале понуда и не разговарале на таа тема. Долгото настојување за одржување на коалицијата со ДУИ, како што рече Филипче, му донела намален број на гласови на СДСМ. Поради тоа вели дека коалицирањето со ДУИ е научена лекција. Додаде дека како партија се водат по принципите на вредносни политики и заемна почит меѓу коалициските партнери.
„Моето мислење е дека во последниот период ДУИ повеќе се доближува до ВМРО-ДПМНЕ со тие националистички реторики коишто ги иницираат во општеството. Сметам дека сакаат да креираат криза за некои прашања, со цел да привлечат дополнително внимание. Впрочем, не знам како да се објасни бегството на Артан Груби, како го пропуштила полицијата, дали тука постои некоја соработка или не, ќе видиме“,
додаде Филипче.