fbpx
Свет

Канадската провинција Британска Колумбија прогласи вонредна состојба поради големите пожари кои беснеат неколку денови

360степени | 19 август, 2023 19:59

Канадската провинција Британска Колумбија прогласи вонредна состојба поради пожарите кои доведоа до евакуација на 15 000 луѓе, а 20 000 се во подготвеност за евакуација.

Според официјални лица, „значителен“ број згради се запалиле во Западна Келовна, град со 36 000 жители, а повеќе од 2 400 домови се евакуирани.

„За само 24 часа, ситуацијата се разви доста брзо и само се влоши во последниот час. Официјалните лица се подготвени за ситуацијата во деновите што следат“,

рече провинцискиот премиер Дејвид Еби на прес-конференција.

Тој додаде дека поради сериозноста на ситуацијата се прогласува провинциска вонредна состојба.

„Летовите се откажани на аеродромот ‘Келовна’ бидејќи приоритет им е даден на авионите кои се борат со шумски пожари“,

соопшти канадската радиодифузна корпорација ЦБЦ, додавајќи дека до крајот на вчерашниот ден во провинцијата имало 366 активни пожари.

Населението во регионот е предупредено да се спакува и да биде подготвено да замине за кратко време бидејќи ситуацијата рапидно ескалира.

Во еден момент пожарникарите останале заробени од пожарот бидејќи спасувале луѓе кои не сакале да се евакуираат.

„Ако добиете наредба за евакуација, ве молиме одете“,

потенцира Еби. 

Во пожарите во Канада изгореа повеќе од два милиони хектари земја.

Градоначалничката на Јелоунајф, Ребека Алти, вчера изјави дека не е јасно кога жителите ќе можат да се вратат.

„За жал, ова сè уште не е завршено. Пожарот продолжува да се приближува и постои голема неизвесност кога жителите ќе можат да се вратат во своите домови“,

рече Алти.

Официјалните лица рекоа дека следните 24 до 48 часа би можело да бидат најтешките.

„Минатата ноќ напорно се боревме за да ја заштитиме нашата заедница. Ноќта се претвори во ден поради портокаловиот сјај на облаците и огнот“,

изјави шефот на противпожарната служба во Западна Келовна, Џејсон Бролунд.

©2023 360 степени, Сите права се задржани