Државјани на други земји, кои се целосно вакцинирани само со вакцини на „Фајзер“, „Модерна“, „Џонсон и Џонсон“ и „Астра Зенека“, можат да пристигнат во Канада најмалку 14 дена после втората доза, а туристите мора да имаат и негативен ПЦР-тест направен до 72 часа пред да пристигнат во Канада, како и да се регистрираат во специјална апликација за патување
Канадските власти од денеска ги отвораат државните граници за целосно вакцинирани странци, кои сега можат и туристички да патуваат во земјата.
Според соопштението на канадското Министерство за надворешни работи, државјани на други земји, кои се целосно вакцинирани само со вакцини на „Фајзер“, „Модерна“, „Џонсон и Џонсон“ и „Астра Зенека“, можат да пристигнат во Канада најмалку 14 дена после втората доза. Покрај тоа, туристите мора да имаат и негативен ПЦР-тест направен до 72 часа пред да пристигнат во Канада, како и да се регистрираат во специјална апликација за патување.
Царинските службеници го задржуваат правото да упатат патник на брз тест за коронавирус. На целосно вакцинираните странци нема да им биде потребен 14-дневен карантин, како што сега им е наложено на невакцинираните Канаѓани кога ќе се вратат дома.
Според упатството од Министерството за надворешни работи, децата под 12-годишна возраст можат да бидат без вакцини, но мора да бидат придружени од целосно вакцинирани родители или старатели. Тие, исто така, не мора да бидат во карантин две недели, но на децата им е забрането да ги посетуваат образовните институции и места каде што има поголема концентрација на луѓе во текот на првите 14 дена од нивниот престој во Канада.