Околу 20 проценти од светската трговија со нафта поминува низ Ормускиот Теснец, кој е моментално блокиран од Иран, а поголемиот дел од тоа, 85 проценти, оди во азиските земји
Високата претставничка на ЕУ за надворешна и безбедносна политика Каја Калас, посочи дека во Ормускиот Теснец би можел да се користи сличен модел како и во Црното Море за деблокирање на извозот на украинско жито.
„Разговарав со генералниот секретар на ОН, Антонио Гутереш, за тоа дали е можно да се има иста иницијатива како што имавме во Црното Море за извоз на жито од Украина, бидејќи затворањето на Ормускиот Теснец е исклучително опасно за снабдувањето со нафта и енергија во Азија“,
рече Калас пред состанокот на министрите за надворешни работи на ЕУ.
Околу 20 проценти од светската трговија со нафта поминува низ Ормускиот Теснец, кој е моментално блокиран од Иран, а поголемиот дел од тоа, 85 проценти, оди во азиските земји.
Покрај нафтата, голем предизвик е извозот на ѓубрива.
„Ако нема ѓубрива оваа година, ќе има недостиг од храна следната година“,
рече Калас.
Во летото 2022 година, беше постигнат договор меѓу Обединетите нации, Турција и Русија за дозволување извоз преку безбеден поморски хуманитарен коридор во Црното Море.
Калас рече дека министрите ќе разговараат и за тоа дали е можно да се промени мандатот на мисијата на ЕУ „Аспидес“, која моментално е задолжена за заштита на бродовите во Црвеното Море од јеменските хути.
„Ќе разговараме со земјите членки дали е всушност можно да се промени мандатот на оваа мисија. Поентата е дали земјите членки се подготвени всушност да ја користат оваа мисија – бидејќи сакаме да имаме безбедност во овој регион, тогаш би било најлесно всушност да ја користиме операцијата што ја имаме во регионот“,
рече шефицата на европската надворешна политика.
Калас нагласи дека е важно да не се изгуби фокусот на помагање на Украина поради вниманието што сега е насочено кон Блискиот Исток.
Таа го осуди укинувањето на санкциите на САД врз извозот на руска нафта како опасен преседан.
„Ова носи повеќе пари за Русија, исто како што затворањето на Ормускиот Теснец ѝ користи на Русија да ја финансира војната против Украина“,
рече таа.