СДСМ бара поништување на тендерот, но и да се поведе итна постапка од Јавното обвинителство, распит на сите вклучени во тендерот, испитување на можно кривични дела, како злоупотреба на службена положба, местење на тендер и перење пари
И денеска од Социјалдемократскиот сојуз (СДСМ) бараат одговори од министерот за внатрешни работи Панче Тошковски за случајот со тендерот за униформи за специјалните единици што го доби женско модно студио од Битола со двајца вработени и фирма формирана 20 дена пред распишувањето на истиот.
Неговита изјава дека наместо на историјат на понудувачите, се фокусирале на реалниот квалитет на производот, за опозицијата е обид Тошковски да се сокрие и да се претстави како борец за правда.
Оттаму прашуваат како е можно фирма што дотогаш не постоела, да ги исполни сите услови и да достави мостри за квалитет.
„Кој и ги кажал условите однапред? Кој ја подготвил да учествува и да победи? Каде се тие мостри што ги доставила, кога фирмата не ни постоела?“,
пишува во партиското соопштение.
Според опозицијата, Тошковски велејќи дека се воделе по квалитетот на понудата, треба да одговори и како се дефинира квалитет кај фирма без искуство, капацитет и историја на работење.
„Или квалитетот се квалитетни врски и провизии за Тошковски и ДПМНЕ?“,
велат оттаму.
СДСМ бара поништување на тендерот, но и да се поведе итна постапка од Јавното обвинителство, распит на сите вклучени во тендерот, испитување на можно кривични дела, како злоупотреба на службена положба, местење на тендер и перење пари.
Случајот со тендерот за униформи за специјалните единици што го доби женско модно студио од Битола со двајца вработени и фирма формирана 20 дена пред распишувањето на тендерот го објави „360 степени“, по што следуваа реакции од Социјалдемократскиот сојуз (СДСМ) и од Левица.
Министерот за внатрешни работи Панче Тошковски вчера се огласи за случајот и обвинувањата од опозицијата ги оцени како обид за политичка конструкција и дефокус од вистинските реформи.
Постапката, како што дополни, била предмет на задолжителна управна контрола од Бирото за јавни набавки, при што не се најдени никакви неправилности.