На директно прашање, како дошол до документи од Агенцијата за разузнавање дека бил следен додека бил во опозиција, премиерот одговори дека на затворена седница на Владата ја задолжиле Агенцијата за разузнавање да провери дали е злоупотребен капацитетот на институцијата
Точно еден месец помина откако премиерот Христијан Мицкоски, од Собранието, обвини дека тој и членови на неговото семејство биле незаконски следени од разузнавачко-безбедносна агенција додека бил во опозиција. Толку време помина и од моментот кога Обвинителството, по допрен глас, отвори предмет. Единственото што се дозна во меѓувреме е дека станува збор за дејствија кои се случувале во 2020 и/или 2021 година.
Па, темата беше дел од прашањата и во гостувањето на Мицкоски во емисијата „360 степени“ на МРТ 1.
360 степени: Случај со ваше следење. Од собраниската говорница рековте дека Вие, членови на вашето семејство, сте биле следени од една од разузнавачко-безбедносните агенции. Пред да влеземе во дебата за содржината, сакам да ве прашам, како вие стигнавте до документи од Агенцијата за разузнавање?
Христијан Мицкоски: Па, многу едноставно. Многу едноставно. Имавме затворена седница на Владата, на којашто ги задолживме лицата од Агенцијата за разузнавање, врз основа на индициите со коишто располагавме, да направат истрага внатрешно, да видат дали е злоупотребуван капацитетот на Агенцијата за разузнавање или не е.
360 степени: Дали сте сигурен дека сега ова што го зборувате е во духот на нашиот уставно-правен систем? Во која смисла, Агенцијата за разузнавање е под ингеренции на шефот на државата. Вие сте претседател на Владата.
Христијан Мицкоски: Точно. И ние имаме ингеренции врз Агенцијата за разузнавање. Логично е да побараме.
360 степени: Вие сте корисник на дел од информациите, на оние што тие ќе решат да Ви ги достават.
Христијан Мицкоски: Точно, точно. И, не…
360 степени: Но, директорот и заменикот ги именуваше шефот на државата?
Христијан Мицкоски: Точно, но ние врз основа на тие информации можеме да побараме дополнување, значи појаснување и дообјаснување.
360 степени: Сметате дека немате прекршување на закон во тој дел? Со тоа што вие како Влада сте побарале од Агенцијата за разузнавање тој тип на информации.
Христијан Мицкоски: Апсолутно. Само одиме чекор сега понатаму. Јас во ниту еден момент не спомнувам дека станува збор за Агенција за разузнавање.
360 степени: Добро, јас кажав и Вие потврдивте.
Христијан Мицкоски: Не, не. Јас Ви кажав… не Ви кажав дека извор на информацијата е Агенцијата за разузнавање. Јас Ви кажувам дека една од државните агенции коишто се занимаваат со оваа проблематика, ова го документира.
360 степени: Знам што ве прашав. Знам и што одговоривте.
Христијан Мицкоски: Не реков јас дека моите информации се од Агенцијата за разузнавање. Но, Вие ме прашавте за Агенцијата за разузнавање и јас ви кажав, дека Агенцијата за разузнавање, односно лицата од Агенцијата за разузнавање ги поканивме на затворена владина средница и тие ги задолживме, а имаме право на тоа, врз основа на индициите со коишто располагаме, да направат внатрешна истрага. А од која агенција се овие информации коишто јас ги споделив со јавноста, тоа оставам Обвинителството коешто самото рече дека постапува по допрен глас, да ме повика, да дадам исказ и така натаму, па да направи истрага.
По делот во кој се дебатираше за институцијата која го следела тогашниот лидер на опозицијата, разговорот се префрли кон „содржината“. Односно, дали дејствијата кои биле преземени биле незаконски или, пак, во рамките на овластувањата на институцијата, која и да е таа.
360 степени: Е сега, дали станува збор за оперативна Ваша обработка и на членови на вашето семејство или станува збор за белешки произведени врз основа на информации доставени од информатори, какви што ги имаат несомнено тајните служби, агенциите, од вработени во една од тие агенции? И дека после составувањето на тие белешки, нема никакви оперативни постапки понатаму.
Христијан Мицкоски: Ако прашувате како оди тоа методолошки, врз основа на тоа коешто успеав да го видам и да го слушнам, од луѓето со коишто комуницирам, а тие се вработени во агенциите коишто се занимаваат со безбедност, тогаш можам да заклучам дека станува збор за внатрешна процедура, во којашто се користат ресурси на овие агенции, коишто најчесто постапуваат по принципот на добиена информација, без да има материјални докази.
360 степени: Добро, ама и тоа е законски?
Христијан Мицкоски: Па, најверојатно. Јас не сум навлегол сега во детали да ги проучувам процедурите на овие институции, но тоа за мене не е во ред. Сега ќе кажам зошто. Затоа што, ако јас сум финансирал и инспирирал вооружена формација којашто во тој момент претставувала опасност за државниот поредок и Уставот на Македонија, а тоа го констатирала една од овие агенции, тогаш логично е таа агенција да го информира Министерството за внатрешни работи. Прашањето е зошто не го информирала? Ќе го дадам и одговорот. Затоа што во тој период кога таа агенција го констатирала ова, преку информација добиена од свој извор, не го информирала министерот бидејќи во тој период министер е техничкиот министер Наќе Чулев. Затоа што не е точно.
360 степени: Пак ќе ве прашам дали…?
Христијан Мицкоски: …Затоа што ќе се констатирало класична злоупотреба.
360 степени: Ама немало. Значи врз основа на информација добиена од одреден информатор, некој вработен во таа агенција составил белешка, така? И во таа е наведено тоа што е наведено. Велиме законски, нема пречка тоа да се случи, така?
Христијан Мицкоски: Дали има законски пречка, ќе констатираат обвинителите. Само дозволете. Дали законски има пречка, ќе констатира обвинителството, ако навистина допрел гласот таму и потоа, ако има случај, судот.
360 степени: Клучното прашење е дали врз основа на таа информација…
Христијан Мицкоски: Не, не. Врз основа на таа белешка, потоа да ме покриваат како што они стручно велат, или следат, тоа е друга тема.
360 степени: Ама не ве покривале.
Христијан Мицкоски: Па, не би рекол.
360 степени: Сè е завршено на тој тип информирање, од информаторот…
Христијан Мицкоски: Не, не. Врз основа на таа информација и таа белешка, и врз основа на процедурата на таа агенција, се бара алиби за да може институционално да бидам покриван. Без разлика дали е тоа физички или…
360 степени: Е сега да, големото прашање е дали тоа се случувало или не се случувало, а станува збор за информатори на таа служба коишто практично нашле начин како да Ви се доближат Вам.
Христијан Мицкоски: Па не знам, некој Цилиндар таму, сега не знам јас кои се тие…
360 степени: Е сега, некои велат дека кажувајќи ги Цилиндар и Џокер, практично сте откриле две важни позиции на службата.
Христијан Мицкоски: Па сега, дали сум открил, не сум открил, тоа значи дека не биле толку важни. Чим тие дале таква информација, дека јас финансирам и инспирирам вооружена терористичка група, којашто е опасност по државниот поредок и Уставот.
360 степени: Ќе оставеле ли трага, еве најздраворазумски, ќе оставеле ли трага да било нешто надвор од процедурите?
Христијан Мицкоски: Па, не може без тоа да биде документирано да бидам јас покриван физички. Мора да има трага. Инаку, како јас би бил покриван? Како, на кој начин јас би бил покриван ?
360 степени: Ама ако не било законски, велам, дали ќе оставеле трага?
Христијан Мицкоски: Што е разликата меѓу злоупотреба на државните ресурси и прислушкување и физичко покривање исто така со злоупотреба на државните ресурси? Претседател на најголема политичка партија во опозиција, во тој момент. Што е разликата? Нема разлика. За ова луѓе се во затвор.
360 степени: Мене ми се многу растегливи тие теми, еве во која смисла. Се сметало отсекогаш дека една од стратешките цели на оваа држава е да стане членка на НАТО. За да стане членка на НАТО, требаше да се реши прашањето за името со Грција. Се склучи Преспанскиот договор. ВМРО-ДПМНЕ, под ваше водство, беше против усвојување на уставните измени во парламентот. Де факто против реализирање на стратешката цел на оваа земја да стане членка на НАТО. Ако одиме пошироко, и против стратешкиот интерес на некој што го нарекуваме стратешки партнер. Дали на таа основа некој можел да Ве следи?
Христијан Мицкоски: Логиката Ваша ја почитувам и во рамките на таа сега ќе дадам една логика, слична на оваа. Тоа е исто како следново. Беласица го победи Вардар. Бидејќи Вардар ја победи Црвена Ѕвезда, а Црвена Ѕвезда го победи Милан или Баерн Минхен и станува европски шампион, значи Беласица е европски шампион. Отприлика вака му доаѓа оваа логика сега вие што ми ја кажувате. Прво, никогаш не било тоа формален услов, решавањето на спорот со името со Грција.