Тие на денешниот „Марш за ангелите“ во Кочани им додадоа поддршка и на лицата против кои синот на сопственикот на „Пулс“ поднесе тужба поради демолирањето на кафулето „Класик“ во трговскиот центар во градот, еден ден по трагичниот пожар. Тој од тужените бара отштета од 1,2 милиони денари или околу 20 000 евра
Правдата што доцни не е правда. Ова денеска го порачаа родителите на загинатите во пожарот во т.н. кабаре „Пулс“ во Кочани од 36. „Марш за ангелите“, истовремено упатувајќи неколку прашања до надлежните органи поврзани со трагедијата во која загинаа 63 лица, а повеќе од 200 беа повредени.
Маршот се одвиваше по редовната рута од „Паркот на револуцијата“ до заградата на Основното јавно обвинителство Кочани и Судот, од каде родителите ги упатија своите пораки и прашања.
Тие им додадоа поддршка на лицата против кои синот на сопственикот на „Пулс“ поднесе тужба поради демолирањето на кафулето „Класик“ во трговскиот центар во градот, еден ден по трагичниот пожар и кој бара од тужените отштета од 1,2 милиони денари или околу 20 000 евра.
За потестување, сопственикот на „Пулс“, Дејан Јованов-Деко и неговиот син Михајло Јованов се меѓу првообвинетите за пожарот во т.н. кабаре, за кој е во тек судски процес.
Родителите и блиските на заганите повторно побараа одговор до каде е истрагата против осомничените полициски службеници кои кобната вечер биле во „Пулс“. Поранешниот државен јавен обвинител Љупчо Коцевски во неколку изјави дадени пред да си поднесе оставка, најавуваше дека јавнообвинителската одлука во врска со истрагата против триесетината полициски службеници треба да биде донесена до средината на декември минатата година, но и по повеќе од еден месец, од ваквите сè уште нема епилог во врска со оваа постапка.
„Драги сограѓани, доста е! Веќе предолго ОЈО ГОКК (Основно јавно обвинителство за гонење на организиран криминал и корупција) ја влече постапката што почна на 12 јуни 2025 година. Со месеци слушаме дека во завршна фаза, а одлука нема. Во трагедија од вакви размери секое доцнење е неправда. Бараме рок, одлука и одговорност. Нема да дозволиме овој случај да стане уште една затурена папка. Ќе бидеме тука додека правдата конечно не биде испорачана. Правдата што доцни не е правда“,
рече Верица Трифунова, мајка на починатата Моника Спасова.
Семејствата прашаа и како може лице за кое се говори дека е осомничено во врска со трагедијата да продава имот кога во тек е судска постапка.
„Како е можно лице поврзано со трагедијата со 63 жртви, кое е дел од истрага или се споменува во јавноста како осомничено, слободно да отуѓува имот без судска забрана и без јасна контрола на потеклото на средствата. Ова е легитимно прашање и не се однесува на лична критика, туку на еднаквост пред законот“,
рече блиска на загинат во кочанската трагедија.
Инаку, семејствата на загинатите, на почетокот на денешниот „Марш за ангелите“, со една минута молк ѝ оддадоа почит на Фросина Кулакова која пред една година беше прегазена на пешачки премин на булеварот „Партизански одреди“ во Скопје.
„Бидејќи овој саботен ‘Марш за ангелите’ е за вистинска правда и за сите млади кои ги загубија животите поради системски пропусти и незаконско работење, оддаваме почит и за трагичната смрт на Фросина, која го загуби животот во сообраќајна несреќа“,
рекоа родителите и блиските на загинатите во „Пулс“.
Судењето за пожарот во „Пулс“ во Кочани се наоѓа во доказна постапка и треба да продолжи в понеделник (26 јануари) со искази на петмина сведоци на Обвинителството.
За пожарот во Пулс се обвинети 35 физички и три правни лица. Меѓу нив се сопственикот на „Пулс“, негови блиски, инспектори на државни институции, поранешни министри и припадници на агенцијата што го обезбедувала т.н. кабаре и нејзиниот сопственик.
На почетокот на судскиот процес сите се изјаснија дека не се чувствуваат виновни и ја оспорија тезата на одбраната дека има каузална, односно причинско-последична врска меѓу нивните дејствија и причината за смртоносниот пожар.