Разбирам став, мислење, но ова е срамота, реагираше познатиот специјалист по детска хирургија, Владимир Чадиковски, прашувајќи зошто протестите не биле пред болниците, за да ги убедат пациентите дека не се болни од ковид
Повеќе лекари и медицински лица реагираат вечерва на социјалнките мрежи по протестот во Скопје, но и во неколку други градови во државата против новите мерки за заштита од ковид-19, кои предвидуваат ограничувања за оние кои не се вакцинирани.
Освен што изразија револт дека биле дискриминирани и дека им се ограничуа слободата, дел од присутните на протестот, со погрдни зборови ги нападнаа лекарите, нарекувајќи ги убијци и оценувајќи дека не лечат според симптоми, туку според протоколи, за да избегнеле одговорност. Имаше навреди и за новинарите, кои беа наречени платеници.
Разбирам став, мислење, но ова е срамота, реагираше на Твитер познатиот специјалист по детска хирургија, Владимир Чадиковски, прашувајќи зошто протестите не биле пред болниците, за да ги убедат пациентите дека не се болни од ковид.
Зошто протести пред Влада и Собрание , по соодветно е пред болниците со болни од Ковид..може ќе ги убедат дека не се болни!!! Огромна поддршка за сите колеги кои се бориме против овој вирус ,кој ни го промени животот!!! Разбирам и подржувам став,мислење,но ова е срамота!! pic.twitter.com/gmCBgsqhZ1
— Vladimir Chadikovski (@chadikovski) August 15, 2021
„Ова е огромно разочарување, не само за медицинарите, туку и за општеството. Секој има право на различно мислење, секој има право да си искаже како ги перципира состојбите, да се вакцинира или не. Но не и на вакви карактеризирања. Никој не бил принуден на лекарски третман, туку секој сам се јавува на лекување. А за ние да лекуваме сме го посветиле цел живот на образување кое трае и до денеска. Никој не бил натеран ниту на вакцинација, бидејќи секој сам си се изразува според негова волја. Туку каде се лекуваат овие лица за кои докторите се ‘убијци’,
напиша на Фејсбук лекарката Марија Михајлова.
Веднаш по протестите, со реакција се јави и министерот за здравство Венко Филипче, посочувајќи дека протестот е уставно загарантирано право, но исто такво е и правото на здравје.
„Секој кој се обидува да прикаже дека се врши наводна присилна вакцинација ја манипулира јавноста. Никој не е присилен на ништо, обврска на државата е да го штити јавното здравје и да носи мерки. Јас разбирам дека сѐ уште има страв и двоумење кај одреден дел од граѓаните и тоа воопшто не е за осуда. Покрај заштита на здравјето, наша должност како Влада е да ги информираме граѓаните за придобивките од вакцинацијата и тоа ќе продолжиме да го правиме“,
нагласи Филипче.
Од денес стапуваат на сила новите мерки за заштита од ковид-19, кои, во еден дел предвидуваат ограничување за невакцинираните за влез во локали и ресторани. Мерките се донесоа по новиот бран на ковид-19 во земјава, откако повторно почнаа да растат бројките на новозаразени и на починати.
Министерот за економија, Крешник Бектеши, изјави дека мерките се воведуваат за да се спречи повторно целосно заклучување.