Последниот договор со кој автобусите на Јавното сообраќајно претпријатие – Скопје биле каско осигурани истекол на 1 јули 2024 година. Тоа значи дека веќе 16 ден возилата не се осигурани
Така, на пример, извесно е дека штетата на автобусот на ЈСП кој заринка во жардиниера во близина на „Мавровка“ ќе треба да ја плати самото претпријатие кое и онака подолго време се жали дека нема средства
Откако управува со главниот град, градоначалничката Данела Арсовска досега смени четири директори на ЈСП – Скопје. Последниот, Драги Кушовски, дојде на местото на Крсте Петревски пред само две недели. А веќе има полни раце работа.
Приватните превозници се закануваат со штрајк. Се случи сообраќајна незгода во центарот на Скопје по која и возачот на автобусот кој учествуваше во несреќата и синдикатот обвинија дека од депото се пуштаат технички неисправни возила, со потпис и печат дека се исправни. За случајот се заинтересира и обвинителството.
Редакцијата на „360 степени“ објави истражување дека повеќето автобуси на ЈСП по скопските улици немаат исправна светлосна сигнализација, а сега откриваме нов голем пропуст.
Каското истекло, нема ново
За секое возило, има два типа на осигурување. Едното е задолжителното и е наречено автоодговорност. Служи за да му се исплати штетата на сопственикот на возило во сообраќајна незгода кој не е виновен за неа. Каско осигурувањето, од друга страна е доброволно и го штити и возилото на оној што е виновен, под услов да имал важечка дозвола и да не бил под дејство на алкохол или дрога.
Каско користат многу фирми, особено транспортните. Меѓу нив и Јавното сообраќајно претпријатите Скопје. Ако се погледне историјатот на тендери на оваа фирма, јасно е дека каско осигурувањето е нешто што се правело во континуитет. Се до неодамна.
Последниот потпишан договор за каско осигурување на возилата на ЈСП е од крајот на јуни 2023 година. Потпишан е со ВИНЕР Виена Иншуренс Груп Скопје, со рок на важност од 1.7.2023 година во следните 12 месеци. Тоа значи дека на 1.7.2024 година овој Договор престанал да важи. А во меѓувреме, не е потпишан нов.
Два пропаднати тендери
Не е дека ЈСП не сакал да набави каско-осигурување. Тоа е планирано во годишниот план за јавни набавки. Планирано било да се започне со активноста уште во текот на месец март.
Но, во ЈСП задоцниле. Го објавиле тендерот на 2 мај 2024 година. Сите пристигнати понуди требало да се отворат на 3 јуни. Иако не било се според Планот за јавни набавки, сепак и вака имале доволно време до 1 јули да склучат нов договор за каско осигурување.
Но, од засега не до крај јасни причини, тендерот пропаднал. Известувањето од ЈСП е дека не била поднесена ниту една понуда или пак дека не била поднесена ниту една прифатлива понуда.
Па, само два дена подоцна, на 5 јуни ЈСП распишува нов тендер за каско осигурување на автобусите, но и за објектите на претпријатието. Набавката е делива, што значи дека може да се конкурира и само за еден сегмент од тендерот кој, патем, бил поделен на три. Роковите биле пократки споредено со првиот тендер, а отворањето на требало да се случи на 26 јуни. Повторно, не е до крај јасно што се случило, но ЈСП на 9 јули испраќа известување до Бирото за јавни набавки дека делот од постапката за каско осигурување на сите возила на претпријатието е поништена.
Молк од ЈСП
Писмено се обративме до ЈСП – Скопје за сите отворени прашања, односно како се дозволило да нема осигурување на возилата ако се знаело дека постоечкиот Договор бил со рок на траење до почетокот на овој месец, како и тоа зошто пропаднале тендерите. Дополнително прашавме, дали и кога ќе биде распишан новиот тендер.
За ниту едно од прашањата не добивме одговор, иако оставивме период од речиси 24 часа за одговор.
И Обвинителството се интересира за ЈСП
Сите овие прашања доаѓаат во период кога се отвори прашањето со исправноста на автобусите на ЈСП во кои се превезуваат скопјани. Двокатен автобус на ЈСП на 8 јули удри и се качи на жардиниера на раскрсницата кај трговскиот центар „Мавровка“ и Универзитетската библиотека „Свети Климент Охридски“ во скопски Центар. Во моментот на ударот патници имало и во горниот и во долниот дел на автобусот.
Итната медицинска помош третираше две патнички кои се пожалија на повреди од ударот.
По инцидентот прес-конференција одржа синдикатот. На настанот непоканет се појави директорот, па иако првично не сакаше да зборува, во дискустијата се вклучи и возачот на автобусот кој доживеа сообраќајна незгода. И тој и синдикатот обвинија, од депото на фирмата се пуштаат возила во сообраќај како да се исправни, а не се. Директорот кажа дека мисли дека тоа не е точно, но остави простор да провери бидејќи е скоро именуван.
Од синдикатот на приватен и административен јавен сектор реагираа дека се возат расипани возила.
„Се возат дефектни возила. Се возат возила без клими. Доколку возачот се повлече во гаражата заради клима, таму го уценуваат и му велат напиши изјава. Ало луѓе, не може така. Не може, кој век сме“,
реагираше претседателката на Синдикатот на приватен административен и јавен сектор на ЈСП Скопје, Елизабета Тошевска.
Несреќата се случи токму во период кога „360 Степени“ привршуваше свое истражување кое покажа дека автобусите на ЈСП се во катастрофална состојба во однос на сигнализацијата.
(ВИДЕО) Метрополата со градски превоз со прегорени светла
Само 21% од автобусите што поминаа на најфрекфентата автобуска постојка во главниот град „Рекорд“, во двата дена во кои ги набљудувавме, немаа никаков проблем со светлосните уреди, 33% имаа само еден недостаток, односно не им работеше светло, трепкач или табла, а дури 46% од автобусите кои поминаа имаа повеќе од еден недостаток.
ЈСП- Скопје и тогаш не одговори на прашањата кои се отворија по истражувањето.
Вчера, на темата ЈСП се приклучи Основното јавно обвинителство Скопје од каде соопштија дека отвораат предмет, особено за несреќата кај „Мавровка“.
„Надлежниот јавен обвинител ќе ги испита и наводите што се изнесени преку јавно искажани изјави од учесници во настанот и од други лица со кои се укажува на незаконитости во работењето на ЈСП Скопје, во поглед на исправноста и одржувањето на автобусот со кој се случи незгодата. За таа цел е ангажирано вешто лице од областа на машинството и издадена е наредба за преземање мерки до МВР – Биро за јавна безбедност да обезбеди податоци и документација од ЈСП Скопје во однос на одржувањето, сервисирањето и исправноста на автобусот, како и организацијата на работниот процес. Согласно наредбата, во присуство на вештото лице ќе се изврши проверка на исправноста на автобусот. Дадени се насоки да се извршат и разговори со лица кои имаaт сознанија за настанот,
се вели во соопштението на Обвинителството.
Работата на ЈСП – Скопје е под лупа уште од почетокот на годинава кога во неколку наврати беа најавени штрајкови на возачите поради неисплатени плати, а проблемите се решаваа со субвенции од Град Скопје за едно од најголемите градски јавни претпријатија.