Со инсталирање и логирање на новата апликација сите средства што корисникот ги поседувал досега во паричникот на „Скопска“ автоматски ќе бидат префрлени на неговата сметка во новата апликација
Граѓаните ќе мора да инсталираат нова мобилна апликација „Скопјебус“ за да купат билет во автобусите на Јавното сообраќајно претпријатие (ЈСП) „Скопје“, оти старата „Скопска“ повеќе нема да биде функционална, информираат од Градот Скопје.
Оттаму велат дека патниците ќе можат да купат билет за едно возење преку својот мобилен телефон вртејќи на бројот 185, но без да го приближат до валидаторот, за што ќе добијат потврдна СМС-порака.
Овој нов метод на плаќање во автобус со мобилен телефон, како што информира градската управа, веќе е активен.
„Цената на билетот за едно возење е 40 денари со вклучен ДДВ“,
се вели во соопштението од градот.
Како граѓаните со мобилен телефон да платат билет во автобус
- Патникот со својот мобилен телефон врти на бројот 185. Слуша „бип“ сигнал и говорна порака: Купивте билет за едно возење со цена од 40 денари во (час/минути);
- При вртење на бројот 185 не е потребно телефон да се приближи до валидаторот;
- Наплатата се врши во истиот момент кога корисникот го завртел бројот 185 и го слушнал „бип“ сигналот, без разлика дали до крај ја ислушал говорната порака;
- На мобилниот телефон стига потврдна СМС-порака, во која пишува: Купивте билет за едно возење по цена од 40 денари за едно возење во (час/минути);
Доколку патникот има проблем со телефонската сметка може да ги добие следните пораки:
– Трансакцијата е неуспешна, немате доволно средства на вашата сметка.
– Трансакцијата е неуспешна, имате активирано забрана, јавете се кај вашиот оператор.
– Веќе купивте возен билет, обидете се подоцна.
– Трансакцијата е неуспешна поради технички причини.
– Трансакцијата е неуспешна, имате надминат лимит за користење на оваа услуга.
За да ја користат новата апликација „Скопјебус“, патниците ќе мора да го скенираат кју-ар кодот што може да се најде во сите автобуси за градски превоз, со што директно ќе ги однесе до упатствата за користење.
Новата мобилна апликација „Скопјебус“ може да се преземе и преку мобилните апликации „Плеј стор“ за корисниците на андроид-уредите и „Апп стор“ за корисниците на „ајфон“.
Со инсталирање и логирање на новата апликација сите средства што корисникот ги поседувал досега во паричникот на „Скопска“ автоматски ќе бидат префрлени на неговата сметка во новата апликација.
