Од претпријатието наведуваат дека од утринава е постигнато нивото на редовно водоснабдување во Железара и Гази Баба, но поради преголемата потрошувачка во скопски Чаир, мрежата се празни пребрзо. Поради тоа упатија молба до граѓаните за рационално користење на водата сè до целосна стабилизација на мрежата
Јавното претпријатие „Водовод и канализација“ информира дека во текот на вчерашниот ден во Скопје успешно е завршена изведбата на зафатот чија цел е подобрување на водоснабдувањето и притисокот на водата, како и намалување на загубите на вода. Изведбата на зафатот започна во рано изутрина на 31 мај и траеше 15-ина часа – период во кој дел од скопските општини имаа делумен или целосен прекин во водоснабдувањето.
Од претпријатието наведуваат дека при повторно пуштање на водата се работи полека и постепено, со цел регулирање на мрежата. Додаваат дека од утринава е постигнато нивото на редовно водоснабдување во Железара и Гази Баба, но поради преголемата потрошувачка во скопски Чаир, мрежата се празни пребрзо.
„Утрово беше постигнато нивото на редовно водоснабдување преку населено место Железара во општина Гази Баба, но поради преголема потрошувачка и повлекување од Чаир мрежата се празни пребрзо, односно пред да може да се стабилизира водоводната мрежа има пад. Се замолуваат граѓаните за трпение и рационално да користат сè до стабилизација на мрежата во спротивно ќе се предизвика недостаток за половина град кој може да трае со денови“,
наведуваат од ЈП „Водовод и канализација“.
Оттаму наведуваат дека вчерашната изведба на главен водоводен приклучок и монтажа на игличест регулационен вентил е потфат кој се прави еднаш во 60 години, со кој се подобруваат хидрауличките услови во водоводната мрежа.