ЈП „Дрисла“: МВР да ги фати и санкционира потпалувачите на пожарите за кои се сомневаме дека се политички мотивирани

„Дрисла“ е единствената санитарна лиценцирана депонија која од 2022 година не согорува отпад, туку со автоклав стерилизира и компримира, со што нема никаква можност за загадување, додаваат од Јавното претпријатие

Три дена по пожарот на „Дрисла“, кој сè уште чади и поради кој скопјани се гушат од загаден воздух, денеска преку соопштение се огласија од Депонијата.

Оттаму нагласуваат дека депонијата нема можност за загадување и апелираат до МВР да ги пронајде и санкционира потпалувачите на пожарите.

„’Дрисла’ е единствената санитарна лиценцирана депонија која од 2022 година не согорува отпад туку со автоклав стерилизира и компримира, со што од истата нема никаква можност за загадување. Сите тековни активности на претпријатието се извршуваат согласно техничко-технолошкиот проектиран процес имајќи ги во предвид заштитата на животната средина, здравјето на човекот и природата, а во согласност со постоечките законски прописи. Апелираме до Министерството за внатрешни работи да пристапат кон истрага за изнаоѓање и санкционирање на потпалувачите на пожарите, кои се сомневаме дека се политички мотивирани за дефокусирање од реалните проблеми. Депонија ‘Дрисла’ без вакви намерни инциденти нема никаков потенцијал за загадување и работи според највисоки стандарди“,

се наведува во соопштението на ЈП Депонија „Дрисла“.

Од „Дрисла“ сè уште чади, во делови од Скопје високи концентрации на штетни честички во воздухот

Премиерот Христијан Мицкоски, одговарајќи на новинарски прашања, најави дека Министерството за внатрешни работи денеска ќе се позанимава со состојбата околу депонијата „Дрисла“ бидејќи, како што рече, симптоматично е тоа што пожарот на депонијата вчера беше ставен под контрола, а при крајот на ноќта повторно се распламтил. Тој прстот го впери кон ДУИ.

„Чудно е како може пожар што беше речиси смирен односно ставен под контрола, наеднаш да се распламти и како токму сега откако успешно се справивме со пожарите. Сочувствувам со секој граѓанин којшто го чувствува ова, но чудно е како во одредени јавни претпријатија каде што свои кадри има ДУИ се случуваат вакви работи“,

изјави Мицкоски.

Мицкоски за „Дрисла“: Чудно е како во одредени јавни претпријатија каде што раководи ДУИ се случуваат вакви работи

Инаку, за в.д. директор на „Дрисла“, Арсовска во февруари годинава го назначи Самир Хусени.

Опозицискиот СДСМ, пак, го прозва Мицкоски, посочувајќи дека токму неговата матична партија ВМРО-ДПМНЕ управува со Јавното претпријатие „Дрисла“, заедно со ДУИ.

„Токму Даме Димитровски, актуелниот советник на Мицкоски за животна средина во Владата и поранешен претседател на Комисија за животна средина на ВМРО-ДПМНЕ, е претседател на Управен одбор на ‘Дрисла’. Претходно ВМРО-ДПМНЕ имаше и директор на ‘Дрисла’, Јане Мицевски, магистер за туризам и менаџмент“,

велат од СДСМ.

СДСМ: Претседателот на Управниот одбор на ЈП „Дрисла“ е кадар на ВМРО-ДПМНЕ