Со глобализацијата, се јавуваат и нови видови кривични дела кои претходно не можеле да се предвидат
Случајот „Јавна соба“, кога во група на апликацијата „Телеграм“ илјадници членови споделуваа лични фотографии на жени, девојки и малолетнички и навредливи и понижувачки коментари, покажа дека со глобализацијата, се јавуваат и нови видови кривични дела кои претходно не можеле да се предвидат. Поради тоа, според државниот јавен обвинител Љубомир Јовески, потребни се измени и дополнувања на Кривичниот законик, со најавените кривичните дела „демнење“ и „сексуално вознемирување“, за да се следи современиот развој.
Зошто случајот што беше покренат пред една година сѐ уште е во предистрага, Јовески во интервју за Дојче веле вели дека во него се засегнати многу оштетени лица и има голем број потенцијални сторители. Дополнително, процесот се усложнува бидејќи се постапува за правни и физички лица во странство.
„Неопходна е меѓународна правна помош и меѓународна соработка. ‘Јавна соба’ е профил отворен на платформата ‘Телеграм’, со седиште во странска држава. Оттука, немаме законска можност да наредиме, укинеме, забраниме нејзино функционирање ниту, пак, да наредиме за гонење на сторителите да ни ги дадат доказите. Според тоа, во вакви случаи преземањето определени дејствија бара подолг временски период, но и подготвеност за соработка на странските правосудни органи“,
објаснува Јовески.
Освен јакнењето на законодавството со вакви дела, Јовески апелира и за јакнењето на јавната свест и поголема улога на медиумите.
„Јавноста треба да биде едуцирана за потребата од заштита на сопствената приватност и приватноста на други лица и штетата што им се нанесува на оштетените жртви преку вакви дејствија, објавување на нивни фотографии во сексуален контекст, особено кога станува збор за малолетни лица. Јавната свест е значајна и за охрабрување на граѓаните навремено да ги пријавуваат ваквите кривични дела, со што се обезбедуваат докази за откривање и казнување на сторителите и за ефикасен кривичен прогон“,
вели Јовески за ДВ.