Сите судии и обвинители кои не работат професионално, според Јовески, не се наоѓаат на вистинското место
Предизвикот на обвинителите и судиите во битката за обезбедување на владеењето на правото и еднаков пристап до правдата е секојдневен. Во таа битка тие често се критикувани и напаѓани, истакна јавниот обвинител Љубомир Јовески во синоќешното обраќање на свечениот настан по повод 15-годишнината од создавањето на Академијата за судии и јавни обвинители. Сепак, според Јовески, ова треба да биде само поголем мотив за јавните обвинители и судиите да ја извршуваат функцијата професионално, непристрасно и одговорно.
Јовески ја нагласи виталната улога што ја има правосудството во креирањето на основите врз кои почива секоја демократија.
„Ние, обвинителите и судиите, во работата и одлуките кои ги носиме, мора да ја обезбедиме еднаквоста на граѓаните пред законот. Се додека не се постигне тоа, граѓаните нема да имаат доверба во нашата работа. Тоа ја поткопува правната сигурност во општеството и е плодна почва за корупцијата која не познава граници и подеднакво ги напаѓа развиените и неразвиените држави. Ниту една држава, без разлика колку е демократска, не е имуна на корупција. Но, ова не треба да ни биде алиби или оправдување за толерирање на оваа општествена болест која ја разградува економијата, ја урива демократијата и не оддалечува од посакуваната иднина во Европската Унија“,
порача Јовески
Тој потенцира дека не треба да се бараат оправдувања за критиките за неефикасност на кривичниот прогон, за застарување на гонење и за неефикасност на рочиштата. Јовески објасни дека праксата за подолги судски процеси не обезбедуваат правда, туку дека „бавната правда, често е и неправда“. Според јавниот обвинител, оние судии и обвинители кои своето работење го темелат на други интереси кои не се во рамките на професионалното работење, не се наоѓаат на вистинското место.
„Сум ја вршел судската сега и обвинителската функција и затоа можам да кажам дека и чест и гордост, но и голема одговорност е да си обвинител или судија. Јавната доверба во правосудниот систем и во моралниот авторитет и интегритет на обвинителите и судиите е од голема важност во демократското општество. Мора да се работи независно, врз основа на доказите и фактите во постапката, без надворешни влијанија, предубедувања, притисоци, закани или мешања“,
апелираше Јовески додавајќи дека правосудните реформи не смеат да бидат само на хартија.
Според него, Академијата за судии и јавни обвинители е пред постојан и сериозен предизвик да едуцира и да подготви искусни и обвинители и судии со интегритет, кои нема да го користат и злоупотребуваат правото, туку ќе обезбедат негово владеење и ќе го гарантираат основниот уставен постулат за еднаквост на граѓаните.
„Реформите во правосудниот систем не би биле одржливи без соодветно подготвени професионални кадри. Во почетната и континуираната обука што се одвива во рамките на Академијата треба да се применат најдобрите европски практики, а особено внимание да се посвети на зајакнување на интегритетот на јавните обвинители и судиите и на обучување на теми поврзани со спречување и борба против корупцијата“,
рече државниот јавен обвинител.