Во исто време во акцијата во Белгија од слобода се лишени 11 лица и е извршен претрес на 20 локации, а во Холандија при претрес на пет локации биле уапсени пет лица. Меѓу уапсените лица во Белгија и Холандија има и македонски државјани
Утринава на шест локации на територијата на Скопје е спроведена акција при што се лишени од слобода две лица, соопшто вечерва Јавното обвинителство. Во исто време се спроведени и акции во Белгија и Холандија од тамошните истражни органи.
Против двете лица Основното јавно обвинителство за гонење на организиран криминал и корупција ќе донесе Наредба за спроведување на истражна постапка против двете лица за кои постои основано сомнение за кривично дело – Перење пари и други приноси од казниво дело.
Акцијата е спроведена по Барање за меѓународна правна помош, и според кое под раководство на белгиски истражен судија се спроведува истрага за криминална организација која меѓудругото се занимава и со неовластено одгледување на канабис и продажба на наркотична дрога.
Каако што соопштија од ЈО, од дејствијата на Истражниот судија и Федералната судска полиција на Западна Фландрија, утврдено е дека поголемиот дел од членовите на организираната криминална група се македонски државјани или потекнуваат од нашата држава, а останатите се од Холандија, Бугарија и белгиски државјани.
Групата на неколку плантажи во Белгија неовластено одгледувала канабис од 1 јануари 2020 година, а можеби и порано. Секој член на криминалната група имал своја улога во криминалната организација (оддржување на насадите на плантажите, продажба, транспорт, оддржување на локацијата за одгледување на марихуаната, плаќање на сметки за комунални услуги со лажни патни исправи итн). Осомничените македонски државјани периодично биле на релација Белгија и Холандија – Република Северна Македонија со оглед дека во матичната земја имаат семејства. Воедно, тамошната истрага утврдила дека осомничените дел од парите стекнати со кривично дело ги носат во РС Македонија, а со дел купуваат недвижен имот на Белгискиот пазар на недвижности.
Во акцијата се запленети парични средства, оружје, возила и златен накит, како и докази од трансакции на големи суми на пари на банкарски сметки , притоа од слобода се лишени две лица кои ќе бидат изведени пред судија на претходна постапка при Основниот кривичен суд – Скопје.
Поради постоење околности што укажуваат на постоење на опасност осомничените да избегаат, да се скријат, како и да ги уништат трагите од кривичното дело, да влијаат врз сведоци или да го повторат делото, надлежниот јавен обвинител до судијата на претходна постапка ќе достави Предлог за определување на мерка притвор за осомничените. Воедно, обвинителството ќе побара и привремено замрзнување на имотот на осомничените лица.
Во исто време во акцијата во Белгија од слобода се лишени 11 лица и е извршен претрес на 20 локации, а во Холандија при претрес на пет локации биле уапсени пет лица. Меѓу уапсените лица во Белгија и Холандија има и македонски државјани.