Активно се постапува во предметот со поранешната директорка на Клиниката за дерматологија – Скопје, информираат од Основното јавно обвинителство – Скопје.
Како што се наведува во нивното соопштение, на 19 март од страна на СВР Скопје било поднесено писмено известување во врска со предавањето што таа го одржала пред поголема група доктори.
Според скопското обвинителство, во тоа известување не била приложена целата потребна документација, туку само писмена документација која се однесува на тоа кога лекарката се вратила во земјава од Италија и кога и била констатирана здравствената состојба на Клиниката за инфективни болести.
„Заради комплетирање на потребната документација, веднаш следниот ден, на 20 март, надлежниот јавен обвинител достави наредба до СВР Скопје, како подносител на известувањето, како и барање за доставување податоци до Министерството за здравство. Од нив се бара да се приложат сите релевантни писмена документација во смисла на тоа кој ден поранешната директорка го држела предавањето, список на лица учесници на тој семинар, дали и кои од тие лица биле заразени со коронавирусот и да се приложи писмена медицинска документација за инфицираноста, како на поранешната директорка така и на учесниците на семинарот на кои таа им предавала“,
велат од обвинителство.
По поднесената наредба и барање сè уште не е постапено. По доставувањето на релевантната писмена документација, доколку има потреба обвинителството ќе преземе и други истражни дејствија, по што ќе донесе јавнообвинителска одлука.