Како претседател на Сојузот на Стопански комори на Македонија со господинот Заев имам далеку повеќе средби и контакти на официјални форуми отколку со господинот Никола Груевски. Тоа не значи дека сум човек на господинот Заев, како што не сум човек ни на господинот Груевски. Ако треба да бидам нечиј човек, ќе ја прифатам улогата да бидам човек на скопјани, порача Арсовска
Искрено жалам што иако кампањата за градоначалник се уште не е започната, нападите кон мене како личност не престануваат. Очигледно мојата кандидатура предизвикува вознемиреност кај одредена структура, па од недостаток на идеи за подобар и достоен живот за нашите сограѓани, некој одбира да се служи со интриги, клевети и манипулации, напиша на својот Фејсбук-профил, независната кандидатка Даниела Арсовска за градоначалник на Скопје, по реакциите на СДСМ од каде ја обвинија дека глуми независност, откако ВМРО-ДПМНЕ официјално ја поддржа нејзината кандидатура.
„Сакам да повторам дека никогаш не сум била член на ниту една политичка партија и сум натпартиски и независен кандидат, односно кандидат на скопјани. Меѓутоа во интерес на вистината и за прецизно информирање на скопјани сакам да го кажам следново: Како претседател на Сојузот на Стопански комори на Македонија со господинот Заев имам далеку повеќе средби и контакти на официјални форуми отколку со господинот Никола Груевски. Тоа не значи дека сум човек на господинот Заев, како што не сум човек ни на господинот Груевски. Ако треба да бидам нечиј човек, ќе ја прифатам улогата да бидам човек на скопјани“,
напиша Арсовска.
Во однос на јавните напади кон мене за моето назначување како почесен конзул на Унгарија, додава Арсовска, сакам да потенцирам дека за истото согласност и одлука донесе актуелната Влада предводена од СДСМ, додека егзекватура за истото е потпишана од актуелниот министер за надворешни работи, господинот Бујар Османи.
„ За лагите и шпекулациите дека сум донатор на било која политичка партија ги овикувам засегнатите да поднесат каков било доказ. Бидејќи тоа не е вистина, барам веднаш јавно да се извинат, во спротивно мојот правен тим ќе покрене соодветна постапка пред надлежните судски инстанци. За крај сакам да истакнам дека мојот мотив за влез во оваа градоначалничка трка е исклучиво подобрување на стандардот на граѓаните на Скопје, јасно презентиран во мојот концепт и визија за едно европско, современо и различно Скопје. Ја користам оваа прилика уште еднаш да се заблагодарам на граѓаните кои го препознаа овој концепт и ја дадоа својата поддршка изразувајќи ја со давање потписи на определените места од Државната изборна комисија“,
порача Арсовска.