Ишиба рече дека Јапонија треба да ја намали зависноста од нуклеарната енергија во корист на обновливите извори и повика на азиска верзија на безбедносниот блок на НАТО за да се спротивстави на заканите од Кина и Северна Кореја
Поранешниот министер за одбрана Шигеру Ишиба ќе стане нов јапонски премиер откако денеска победи на лидерскиот натпревар во неговата партија – владејачката ЛДП, откако трката заврши во вториот круг на гласање, јавува Си-ен-ен.
Тој ќе ја преземе командата со четвртата по големина економија во светот кога парламентот ќе се состане во октомври, каде што неговата партија има мнозинство.
Ишиба беше еден од деветте кандидати и ја победи министерката за економска безбедност Санае Такаичи – која се натпреваруваше да стане првата жена лидер во Јапонија.
Политичкиот ветеран вети „целосен излез“ од високата стапка на инфлација во Јапонија, нагласувајќи дека ќе постигне реален раст на платите.
Тој, исто така, ја поддржува легислативата што може да им овозможи на мажените жени да го задржат своето моминско презиме.
Ишиба рече дека Јапонија треба да ја намали зависноста од нуклеарната енергија во корист на обновливите извори и повика на азиска верзија на безбедносниот блок на НАТО за да се спротивстави на заканите од Кина и Северна Кореја.
Ишиба ќе го наследи премиерот во заминување Фуми Кишида, кој во август најави дека ќе се повлече по само еден мандат на функцијата, откако серијата политички скандали ги поттикнаа повиците за негова оставка.