Јаневска најави системско решавање на ангажманот на образовните асистенти – од јануари ќе бидат присутни и во средните училишта

„Она што сметам дека е важно е асистентите да го следат ученикот во неговиот цел образовен процес, освен ако аиситентот не одлучи да се исклучи од овој процес или на инсистирање на родителите дека нивното дете може да постигне подобар успех со друг асистент, бидејжи понекогаш е неопходна промена на асистент. Значи целиот процес ќе го решиме системски, за во иднина да немаме проблеми“, вели министерката за образование

Денеска образовните асистенти почнаа да ги потпишуваат договорите за работа со училиштата за оваа учебна година, па затоа можеби нема сите веднаш да почнат со работа. Но, следните денови тој процес ќе заврши. Ова денеска го изјави министерката за образование Весна Јаневска при посетата на основното училиште „Ѓорѓија Пулевски“ во Општина Аеродром, од каде зборувајќи во врска со недостигот на образовните асистенти во училиштата, најави дека проблемот во иднина системски ќе биде решен.

Доцнењето на ангажманот на образовните асистенти на почетокот на учебната година, Јаневска го оправдува со чекање на ребаласот на буџетот, и како што рече, со работењето на училиштата на различни начини.

„Ресурсниот центар ‘Златен Сремец‘ што ја покрива оваа територија успешно го привршува процесот, денес во ова училиште, а верувам и во другите има образовени асистенти“,

вели таа.

Според неа, се работи на системско решение за ангажманот на образовните асистенти, односно најави дека во новите закони за основно, средно и средно стручно образование ќе се определи рок во кој треба да биде завршена целата постапка, односно во месец јуни веќе ќе се знаат образовните асистенти за следната учебна година.

„Голема новина е што обезбедуваме образовни асистенти и за средните училишта, што досега не беше случај. Она што сметам дека е важно е асистентите да го следат ученикот во неговиот цел образовен процес, освен ако асистентот не одлучи да се исклучи од овој процес или на инсистирање на родителите дека нивното дете може да постигне подобар успех со друг асистент, бидејжи понекогаш е неопходна промена на асистент. Значи целиот процес ќе го решиме системски, за во иднина да немаме проблеми“,

рече таа.

Очекува образовни аисситенти во средните училишта да има најрано во јануари 2025 година.

„Законот многу скоро ќе биде ставен на јавна расправа, сите ќе можат да го видат и ќе можат да реагираат ако имааат забелешки на некои челнови. Таа треба да заврши, па да помине на Влада, да се поднесе во Собрание“,

вели Јаневска.

Јаневска за едносменската настава: Идејата е наставниците и учениците повеќе да се ангажираат на училиште за да се подигне квалитетот на знаењето

Уште минтата недела министерката најави дека од денеска ќе се реши проблемот со образовните асистенти. Проблемот со недостигот на образовни асистенти, таа го лоцираше во училиштата.

На почетокот на учебната година во училиштата во земјава беа ангажирани 815 асистенти, додека за 200 асистенти тече постапката за нивно ангажирање.

Образовните асистенти треба да им помагаат на учениците со посебни потребни полесно да ја следат наставата и да го совладуваат наставниот материјал.