Поради зајакнатите мерки за контрола, министерката очекува бројот да биде уште помал на полагањето на вториот екстерен испит на 11 јуни кога и додаде дека ќе имаат информации за сите отстранети што препишувале, но дека оваа бројка нема да биде многу поголема
Десетина ученици биле отстранети од полагањето на првиот екстерен испит од државната матура во саботата зашто се обиделе да препишуваат од телефон, информираше денеска министерката за образование и наука Весна Јаневска.
„Од информациите што досега ги имам, бидејќи процесот сè уште не е комплетиран, бројот на ученици што препишувале е значајно намален. Во моментов имаме информации за десетина деца што се отстранети од тестирањето, кои се фатени дека препишуваат од телефон. Информациите се собираат и за некој ден ќе бидат комплетни. Со оглед на тоа колку беа отстранети минатата година, сметам дека има напредок и очекувам секоја година тоа да биде се подобро и подобро“,
рече Јаневска одговарајќи на новинарско прашање при посетата на објектот во изградба за ОУ „Крсте Мисирков“ во Ченто.
Поради зајакнатите мерки за контрола, министерката очекува бројот да биде уште помал на полагањето на вториот екстерен испит на 11 јуни кога и додаде дека ќе имаат информации за сите отстранети што препишувале, но дека оваа бројка нема да биде многу поголема.
Јаневска апелираше до учениците кои се обидуваат да го излажат системот и да препишуваат, дека тоа им штети ним, а потоа и на сите други.
„Ризикуваат да изгубат цела година од животот или да влезат на пазарот на трудот или да го продолжат образованието“,
додаде Јаневска.
Над 15 000 ученици завчера полагаа прв дел од државната матура со тестот по мајчин јазик (македонски, албански, турски, српски) и литература, кој е задолжителен за сите матуранти.
Идната среда (11 јуни) матурантите ќе го полагаат вториот екстерен испит кој е по нивни избор. Најголем број пријавени – над 13 000, има за тестот по англиски јазик.