Двајцата директори на училиштата се степаа во дискотека во центарот на Кавадарци во саботата, по што МВР информира дека се приведени затоа што ги нарушиле јавниот ред и мир и агресивно се однесувале кон лица од обезбедувањето
Кадаваречкиот градоначалник Митко Јанчев бара училишните одбори на основните училишта „Димката Ангелов Габерот“ и „Тошо Велков Пепето“ во Кавадарци да донесат одлука за разрешување на директорите на овие училишта откако беше објавено дека двајцата се степале во дискотека.
Во соопштението од кабинетот на Јанчев се вели дека градоначалникот и општинските служби денеска ја разгледале состојбата со инцидентот кој се случи на 10 јуни.
„Доставени се дописи до училишните одбори на ООУ ‘Димката Ангелов Габерот’ и ООУ ‘Тошо Велков Пепето’. Се бара разгледување на информациите од ОВР Кавадарци и СВР Велес за инцидентот во кој се вклучени двајцата директори и училишните одбори да донесат одлука за разрешување на Ѓорѓи Ѓорчев од директорската функција во ООУ ‘Димката Ангелов Габерот’ и Сашко Пановски од директор на ООУ ‘Тошо Велков Пепето’“,
се додава во соопштението на кавадаречкиот градоначалник.
Веста за препирката меѓу двајцата директори на училиштата првично се рашири на социјалните мрежи, каде што беше споделено и видео од тепачката, а подоцна и МВР го потврди инцидентот.
„На 10.6.2023 во 1:15 часот, полициски службеници од Полициската станица Кавадарци ги привеле С. П. (54) и Ѓ. Ѓ. (39), двајцата од Кавадарци, затоа што пред угостителски објект во Кавадарци го нарушиле јавниот ред и мир и агресивно се однесувале кон лица од обезбедувањето. По целосно документирање на случајот, ќе биде поднесен соодветен поднесок“,
соопшти МВР во саботата.