Министерот за здравство Арбен Таравари истакна дека оваа 2025 година по се изгледа ќе биде бериќетна година, бидејќи во иста минута се родени две деца – првото момче на Клиниката за гинекологија, а второто девојче неколку секунди подоцна на Клиниката во Чаир
Министерот за здравство Арбен Таравари, неговата сопруга Нора, заменик-министерот Јовица Андовски, сопругата на премиерот Рози Мицкоски, како и заменик-министерот за социјална политика, демографија и млади Ѓоко Велковски, Клиниката за гинекологија во Скопје го посетија првороденото бебе – Јаков.
„Ако денот се познава по утрото, можам да кажам дека ќе имаме навистина плодна и бериќетна година, затоа што само една секунда по Новата година ние го породивме Јаков. На свет дојде жив машки плод со родилна тежина од 3 190 грама и 50 см. Мајката е Сања Талевска. Јаков по името навестува убава и јака година, која се надевам на сите ќе ни биде плодна и бериќетна. Им посакувам на Сања и Јаков да имаат среќни и успешни мигови. Воедно и на сите граѓани на Република Македонија,
рече директорката на Клиниката, Ирена Алексиоска-Папестиев.
Министерот за здравство Арбен Таравари истакна дека оваа 2025 година по се изгледа ќе биде бериќетна година, бидејќи во иста минута се родени две деца – првото момче на Клиниката за гинекологија, а второто девојче неколку секунди подоцна на Клиниката во Чаир.
„Чест ни беше што вака заедно и со Министерството за социјална политика и сопругата на премиерот и директорката ги видовме и мајката и детенцето. И двајцата изгледаат убави, перфектно задоволни од услугите кои ги добиле од Универзитетската клиника за гинекологија“,
рече Таравари.
На новинарско прашање, дали има некој неформален натпревар со царски рез да се породи бебе само за да биде прво во Новата година, министерот Тараравари отфрли таква можност.
„Воопшто не верувам во тоа, нашите доктори се професионалци. Битно е што повеќе деца да ни се раѓаат, тоа е најважно. Ние имавме група во која што добивавме информации од двете клинии во Скопје. За среќа, во иста минута добивме информација за породено дете и на Гинекологија и во Чаир, така што да се множат вакви вести да имаме што повеќе новородени деца во секоја минута“,
рече Таравари и најави дека по ГАК заминуваат во посета и на девојченцето во Чаир.
Директорката Алексиоска-Папестиев изјави дека во новата година веќе се родени пет бебиња.
„Лани завршивме со 3 873 новородни. Значи секоја година се помал е овој број, но процентуално минатата година е и поголем, оти за жал во целата држава се помалку се раѓаат. Но, се надевам дека овој тренд ќе се промени и дека веќе наредната година ќе се пофалиме да ја надминеме поовторно четворката“,
рече таа.
Заменик-министерот за социјална политика, демографија и млади Ѓоко Велковски, рече дека традиционално тие го доделуваат златникот на првородентото дете. Златник ќе добие и новороденчето во Клиниката во Чаир.