Незадоволни од новиот тарифник што го предлага Министерството за правда, а со кој се предвидува намалување на наградата при извршување на парични побарувања од граѓани од 1.000 на 300 евра, денеска протестираат извршителите.
Како што соопшти претседателот на Комората на извршители на Република Северна Македонија (КИРСМ), Зоран Димов протестот е со еднодневен прекин во работата.
Во синоќешното соопштение Комората на извршители наведе дека остануваат на одлуката од 23 овој месец со која изразуваат незадоволство со предлогот на надлежното Министерство за правда за корекција, односно намалување на тарифата за награда и надоместок на другите трошоци за работата на извршителите.
„Од повторното намалување на тарифата во тековната година, особено незадоволство изразува Собранието на извршителите бидејќи со таквиот предлог извршителските канцеларии се доведуваат во финансиска несолвентност“, стои во соопштението.
Граѓани обединети во Иницијативата „Стоп за извршители“ веќе неколку месеци протестираа пред Министерството за правда. Револтирани од работата на извршителите, тие на протестите бараа запирање на блокирањето на сметките, ограничување на времетраењето на наплата на долгот и регулирање на застареноста на долговите.