Известувачот за Западен Балкан во германскиот Бундестаг, Адис Ахмедовиќ, вели дека патот, кон Европската унија ќе даде гаранција за стабилност, мир, слобода, демократија и просперитет. Тој на брифинг со новинарите во Скопје рече дека затоа Северна Македонија треба да го поддржи компромисот и да го продолжи тој пат.
„Оваа недела е историска за граѓаните на Република Северна Македонија, бидејќи во текот на истата ќе се изгласа за иднината на земјата. Морам да напоменам дека одлуката којашто денес или утре најверојатно ќе биде донесена, е прилично тешка за македонскиот народ која што исто така содржи и многу одговорност и обврски коишто треба да се исполнат“,
рече Ахмедовиќ.
Вели дека доколку биде донесена позитивна одлука, меѓу Северна Македонија и земјите членки на ЕУ ќе има не само официјални средби, туку тие ќе бидат и од билатерален аспект. Посочи дека разбира оти тоа не е лесно, но најдоброто нешто што може да се случи е да се оди по патот кон Унијата.
„Цели 17 години вашата земја чека за влез во ЕУ, и во моментов тоа е единствената шанса која што може да се искористи бидејќи сте многу малку пред влезот во ЕУ“,
вели Ахмедовиќ.