Според Националната комисија за борба со насилниот екстремизам и тероризмот, околу 143 граѓани на Северна Македонија (со исклучок на деца) во изминативе неколку години патувале за Сирија, Ирак или во двете земји да се вклучат во терористички групи, забележува Стејт департментот во извештајот
Без терористички напади во 2021 година и без пријавени заминувања на борци за да се приклучат на ИСИС, сепак главниот антитерористички проблем со кој се соочи Северна Македонија во 2021 година беа враќањата на странските борци од Сирија и Ирак со оглед на способноста на овие поединци да воспостават насилни екстремистички ќелии, да планираат напади и да радикализираат други лица, се вели во најновиот извештај на Стејт департментот за тероризмот во светот за 2021 година.
Според Националната комисија за борба со насилниот екстремизам и тероризмот, околу 143 граѓани на Северна Македонија (со исклучок на деца) во изминативе неколку години патувале за Сирија, Ирак или во двете земји да се вклучат во терористички групи. Од нив, 133 лица се мажи, десет се жени, 38 биле убиени, 79 се вратени, петмина се верува дека останале во Сирија и двајца се во затвор во бегалски камп. Додека, пак, 16 лица, 11 мажи и пет жени, се репатрирани, а тројца биле депортирани од други земји.
Властите оценија дека нивото на терористичка закана е „просечно висока“ или средна бидејќи членови и симпатизери на ИСИС се присуни во земјата.
Во јули 2021 година Владата репатрирала четири странски терористистички борци и 19 члена на семејствата.
Во извештајот се вели дека правната рамка на Северна Македонија е адекватна за прогон на лица осомничени за извршување или помагање терористички активности или учество во странски војски. Законот за казнувања поврзан со овие прекршоци останува предизвик, но е подобрен во споредба со претходните години и затворските казни се општо земено подолги отколку кај другите земји од Западен Балкан.
Министерството за правда на САД обезбедило менторство и обука со наоди од терен за обвинителите и истражителите.
Северна Македонија е исто така дел од институциите за борба со финансискиот тероризам, како регионалното тело „Мoneywal“. Донесен е нов закон за запирање на перењето пари и финансирање тероризм за имплементацијата на Директива V (2018/843) и хармонизација со законодавството на ЕУ.
Канцеларијата за финансиско разузнавање на Северна Македонија во 2021 година примила пет извештаи од банки поради основано сомнение за финансирање терористи и во врска со тоа до надлежните служби поднеле 11 извештаи.
Северна Македонија, исто така, е вклучена во борбата со насилниот екстремизам и во 2021 година продолжила со соработка со останатите земји од Западен Балкан за борба со тероризмот и насилниот екстремизам, и учествувала во повеќе проекти поврзани со ова.
Владата имплементирала проекти за изградба на капацитети поддржани од САД, Велика Британија, Италија, Холандија, Норвешка и други, а овие напори ќе помогнат на Северна Македонија да се подготви за претседавањето со ОБСЕ во 2023 година, се вели во извештајот на Стејт департментот.