Во извештајот на специјалниот советник Џек Смит се тврди дека доказите обезбедени во истрагата би биле доволни за да се осуди Трамп во евентуален судски процес доколку неговиот успех на изборите во 2024 година не го оневозможи обвинителството да продолжи со постапката
Новоизбраниот американски претседател Доналд Трамп ќе беше осуден за незаконски обид за поништување на резултатот од претседателските избори во 2020 година, кои ги загуби, доколку не беше реизбран на функцијата во 2024 година.
Ова е заклучокот од делумно објавениот извештајот на специјалниот советник Џек Смит, кој работеше на истрагата за обидот на Трамп да ја суспендира демократијата, по изборниот пораз од Џо Бајден во 2020 година.
Доказите против Трамп беа доволни за да се добие осудителна пресуда во судски процес, напишал Смит во делумно објавениот извештај, пренесуваат светските медиуми.
Трамп веднаш возврати по објавите во медиумите во врска со извештајот, велејќи дека Смит е полуден и дека неговите наоди се лажни.
Докази доволни за осудителна пресуда
Извештајот на Џек Смит во кој се детализирани наодите на неговиот тим рано утрово е објавен од Министерството за правда на САД.
По упадот и насилствата во американскиот Капитол на 6 јануари 2021 година, Смит беше назначен за специјален советник да ги истражи напорите на Трамп да ги поништи изборите во 2020 година. Неговата истрага кулминираше со детален извештај доставен до јавниот обвинител Мерик Гарланд.
Во него, Смит тврди оти верува дека доказите би биле доволни за да се осуди Трамп во евентуален судски процес доколку неговиот успех на изборите во 2024 година не го оневозможи обвинителството да продолжи со постапката.
„Ставот на одделот дека уставот забранува продолжување на обвинението и гонење на претседателот е категоричен и не се осврнува на тежината на злосторствата, силата на доказот на владата или основаноста на обвинителството, зад кое канцеларијата целосно стои.
„Навистина, но за изборот на г. Трамп и неизбежното враќање на претседателската функција, канцеларијата оцени дека доказите се доволни за да се добие и да се одржи пресуда во судски процес “,
пишува Смит.
Трамп беше отповикан за неговата улога во поттикнувањето на бунтот на 6 јануари, обвинет од конгресната комисија за учество во „повеќеслоен заговор“ и на крајот обвинет од Министерството за правда по четири точки, вклучително и „заговор за измама“ на САД.
Трамп се изјасни за невин по сите обвиненија.
По објавата на извештајот, Трамп, во објава на својата веб-страница Трут соушл (Truth Social), го нарече Смит „глупав обвинител кој не можеше да го заврши и стави во процедура својот извештај пред изборите“, лани во ноември.
Новоизбраниот претседател ги опиша наводи против него како политички мотивирани обиди да се наштети на неговата кампања и политичко движење. Ова, како што наведува „Гардијан“, ги прави точни неговите пресметки дека може да го прескокне законот со тоа што ќе направи спектакуларно политичко враќање во Белата куќа.
Првиот том од извештајот на Смит прецизно ги опишува наводните дејства на Трамп, вклучително и неговите напори да изврши притисок врз државните службеници, да собира алтернативни електори и да ги охрабри поддржувачите да протестираат против изборните резултати.
Извештајот го подвлекува и постојаното ширење на Трамп на „демонстративни и, во многу случаи, очигледно лажни“ тврдења во врска со изборите во 2020 година, а кои служеа како основа на неговата кампања и придонесоа за упадот во Капитол на 6 јануари.
Инаку, голем дел од доказите наведени во извештајот беа јавно објавени претходно. Сепак, тој вклучува и нови детали, како на пример дека обвинителите размислувале да го обвинат Трамп за поттикнување на нападот на Капитол на 6 јануари според американскиот закон познат како Закон за бунт.
Обвинителите на крајот заклучија дека таквото обвинение претставува правен ризик и дека нема доволно докази дека Трамп имал намера за насилство со целосни размери за време на немирите на Капитол.
Обвиненијата што ги имплицира извештајот на Смит го товарат Трамп за заговор за попречување на изборното потврдување, измама на САД за точни изборни резултати и лишување на гласачите во САД од нивното право на глас.
Канцеларијата на Смит утврди дека обвиненијата можеби биле оправдани против некои козаговорници обвинети дека му помогнале на Трамп да го спроведе планот, но во извештајот се вели дека обвинителите не дошле до конечни заклучоци. Неколку од поранешните адвокати на Трамп претходно беа идентификувани како козаговорници наведени во обвинението.
Трамп: Извештајот е политички мотивиран
Трамп и неговиот правен тим го окарактеризираа извештајот како „политичка работа“ чија цел е да ја наруши претседателската транзиција. Тие во меѓувреме водеа долготрајна правна битка за да го спречат неговото објавување.
Смит, кој го напушти Министерството за правда минатата недела, директно се осврнува на обвинувањата од Трамп и неговите сојузници дека истрагата била политички мотивирана. Тој тврди дека неговиот тим функционирал исклучиво врз основа на факти и закони.
„Мојата канцеларија имаше една северна ѕвезда – да ги следи фактите и законите каде и да водат. Ништо повеќе и ништо помалку. За сите кои добро ме познаваат, тврдењето на г. Трамп дека моите одлуки како обвинител биле под влијание или режирани од администрацијата на Бајден или други политички актери е, со еден збор, смешно“,
пишува Смит.
Смит ја признава политиката на Министерството за правда со која се забранува гонење на актуелниот претседател, фактор што на крајот доведе до отфрлање на обвиненијата против Трамп по неговата победа во 2024 година. Извештајот, исто така, се повикува на пресудата на Врховниот суд за проширување на претседателскиот имунитет, што го искомплицира случајот.
„Иако не бевме во можност да ги изведеме на суд случаите, верувам дека нашиот тим се залагаше за прашањата на владеењето на правото. Верувам дека е важен примерот што нашиот тим го постави за другите да се борат за правда по секоја цена“,
вели Смит во писмото до јавниот обвинител Гарланд приложено како дел од извештајот.
Вториот дел од извештајот го детализира случајот на Смит во кој се обвинува Трамп дека незаконски задржал чувствителни документи за национална безбедност по напуштањето на Белата куќа во 2021 година.
Министерството за правда се обврза да не го објавува тој дел додека трае правната постапка против двајца соработници на Трамп обвинети во случајот.
Трамп, кој в понеделник ќе биде инаугуриран како 47. претседател, минатата недела беше безусловно ослободен од 34 кривични дела за фалсификување деловни досиеја поврзани со исплата на пари на порноактерката Сторми Даниелс за време на изборите во 2016 година.