Отворајќи ја седницата на владата, Нетанјаху објави дека ќе свика состанок на Советот за безбедност во текот на оваа недела за да издаде инструкции до војската за тоа како да ги постигне трите воени цели што беа претходно поставени
Израелскиот премиер Бенјамин Нетанјаху објави дека оваа недела ќе издаде инструкции за продолжување на војната во Појасот Газа. Тој вели дека се решил на ваков чекор бидејќи се зголемува притисокот врз неговата влада за решавање на конфликтот и ослободување на заложниците заробени при нападот на Хамас на 7 октомври 2023 година.
Отворајќи ја седницата на владата, Нетанјаху објави дека ќе свика состанок на Советот за безбедност во текот на оваа недела за да издаде инструкции до војската за тоа како да ги постигне трите воени цели што беа претходно поставени.
„Ние сме среде жестока војна во која постигнавме многу важни, историски успеси, бидејќи не бевме поделени (…) затоа мора да продолжиме да останеме обединети“,
рече Нетанјаху.
Тој ги повтори воените цели – победа над непријателот, ослободување на заложниците и обезбедување дека Газа повеќе не претставува закана за Израел.
Во исто време, израелскиот министер за надворешни работи Гидеон Саар, пред седницата на Советот за безбедност на Обединетите нации (ОН), изјави дека Израел има намера да го стави прашањето за заложниците во центарот на глобалната агенда.
Израелското воено радио, пак, објави дека началникот на Генералшабот на израелската армија, Ејал Замир, е сè повеќе фрустриран од она што го опишува како недостаток на стратешка јасност од политичкото раководство, како и загрижен поради можноста за вовлекување во војна на исцрпување со милитантите на Хамас.
Израелската влада се соочува со зголемен притисок во последните месеци да најде решение за конфликтот. Речиси 600 поранешни функционери од безбедносниот апарат на Израел го повикаа американскиот претседател Доналд Трамп да изврши притисок врз Нетанјаху да ја заврши војната и да им дозволи на заложниците да се вратат дома.
Семејниот форум, главната организација што ги претставува семејствата на заробените во Газа, го обвини Нетанјаху дека го води Израел кон пропаст, а заложниците кон смрт.
„22 месеци на јавноста ѝ се продава илузија дека воениот притисок и интензивните борби ќе ги вратат заложниците, но овие тврдења не се ништо повеќе од лаги и јавна измама“,
смета Семејниот форум.
Од 251 лице киднапирано за време на нападот на Хамас врз Израел на 7 октомври 2023 година, 49 сè уште се држат во Газа. Ова вклучува 27 од оние што израелската војска ги прогласи за мртви. Во меѓувреме, имаше два прекини на огнот за време на кои дел од заложниците беа ослободени.