Преговорите кои се водат во Доха за прекин на огнот во Газа и договор за ослободување на заложниците се во последна фаза, објави денеска Министерството за надворешни работи на Катар, земјата посредник во разговорите меѓу Израел и Хамас
Израелскиот министер за национална безбедност Итамар Бен Гвир го повика министерот за финансии Безалел Смотрич да се придружи кон заканите дека ќе се повлече од владата на премиерот Бенјамин Нетанјаху поради најавениот договор за прекин на огнот и размена на заложници со Хамас, кој тој го смета за погубен.
Бен Гвир тврди дека заедничката оставка може да ги попречи плановите на Нетанјаху. Иако договорот го нарече катастрофа за израелската безбедност, Смотрич сè уште не се закани дека ќе ја напушти владата.
Бен Гвир истакна дека изминатава година успеале да спречат напредок на договорот, но сега смета дека само заеднички притисок може да го спречи премиерот.
Иако Бен Гвир и Смотрич претходно беа сојузници, нивните односи беа затегнати поради несогласувањата околу финансирањето на полицијата, што дополнително ја отежнува соработката во коалицијата. Нетанјаху во моментов зависи од поддршката на нивните партии за да спречи распад на владејачката коалиција.
Преговорите кои се водат во Доха за прекин на огнот во Газа и договор за ослободување на заложниците се во последна фаза, објави денеска Министерството за надворешни работи на Катар, земјата посредник во разговорите меѓу Израел и Хамас.
„Веруваме дека сме во завршна фаза… Секако се надеваме дека тоа ќе доведе до договор многу брзо. Но не треба да се возбудуваме премногу за она што се случува сега додека не биде официјално прогласен прекинот на огнот“,
рече портпаролот на Министерството за надворешни работи Маџед ал-Ансари на прес-конференција.
Тој додаде дека повеќето од пречките за прекин на огнот се надминати.
„Во текот на изминатите месеци имаше нерешени фундаментални прашања, големи прашања меѓу двете страни. Овие прашања беа решени за време на разговорите во текот на изминатите неколку недели и затоа стигнавме до точка каде што се решени главните прашања што го спречуваа постигнувањето договор“,
рече тој.
Договорот за прекин на огнот во Газа може да биде постигнат оваа недела, изјави вчера советникот за национална безбедност на Белата куќа, Џејк Саливан.
„Блиску сме до договор и би можеле да го постигнеме оваа недела. Не давам никакви ветувања или предвидувања, но тоа е на дофат“,
рече Саливан за договорот што ќе вклучува ослободување на заложниците од Појасот Газа.
Израелски официјален претставник, кој сакаше да остане анонимен денеска изјави дека преговорите се во напредна фаза за ослободување до 33 заложници.
„Не сме сигурни дали се работи за часови, денови или повеќе“,
рече официјалниот претставник.