Во меѓувреме, Светската здравствена организација предупредува на колапс на здравствениот систем во Јужен Либан по серијата смртоносни напади врз медицински екипи
Израелските одбранбени сили (ИДФ) проценуваат дека во наредните неколку дена целосно ќе го завршат таргетирањето на речиси сите клучни локации што ѝ припаѓаат на иранската воена индустрија. Според проценките објавени во израелските медиуми, досегашното бомбардирање веќе уништило голем дел од производствените капацитети на Техеран.
Одбранбената индустрија на Иран е исклучително обемна мрежа составена од бројни државни воени тела и приватни компании, а овој комплекс е задолжен за производство на напредни системи за оружје и нивни компоненти, вклучувајќи балистички ракети, системи за противвоздушна одбрана, поморско оружје, сајбер-капацитети, па дури и шпионски сателити.
Израелските воени воздухопловни сили досега во текот на војната таргетирале илјадници вакви средства, онеспособувајќи околу 70 отсто од иранската воена индустрија. Оттаму соопштуваат дека сега се многу блиску до зацртаната цел за уништување на 90 отсто од клучните локации кои се користат за развој на оружје, што претставува директна закана за Израел.
Додека Израел ги сумира резултатите од ударите врз Иран, Светската здравствена организација (СЗО) излезе со алармантни податоци за хуманитарната цена на паралелниот конфликт во Либан. Организацијата соопшти дека деветмина болничари се убиени, а седуммина се ранети во пет одделни напади врз здравствените служби во јужниот дел на земјата.
Шефот на СЗО, Тедрос Аданом Гебрејесус, во својата изјава не прецизира кој стои зад овие напади, но детално ја опиша трагичната слика на терен. Тој информира оти биле погодени екипи на болничари кои работеле во пет либански села додека извршувале должност.
Според неговиот извештај, во местото Зоутар ал-Шаркија загинале пет здравствени работници, а двајца се повредени, од кои еден е во критична состојба. Уште две медицински лица загинале, тројца биле ранети во Кфар Тибнит, а по еден болничар го загубил животот во нападите врз здравствени објекти во Гандурије и во Џезин, додека во Кфар Даџал биле ранети уште две лица.
Овие континуирани напади, како што истакна Тедрос, сериозно ги нарушиле здравствените услуги во јужен Либан. Како директна последица, четири болници и дури 51 центар за примарна здравствена заштита во моментов се целосно затворени, додека неколку преостанати објекти се принудени да работат со драстично намален капацитет.