Нападите се нов тест за кревкото примирје што стапи во сила на 10 октомври, пишуваат светските медиуми
Израелски борбени авиони и тенкови денеска извршија неколку напади на области во источниот дел на Појасот Газа, изјавија палестински жители и очевидци, еден ден откако Израел соопшти дека останува посветен на прекинот на огнот, пренесуваат светските медиуми.
Очевидци изјавија дека израелските авиони извршиле 10 воздушни напади во областите источно од Кан Јунис во јужниот Појас Газа, а тенковите гранатирале области источно од градот Газа на север од енклавата.
Засега нема извештаи за повредени или загинати лица.
Израелската армија потврди дека извршила „прецизни“ напади врз „терористичката инфраструктура што претставува закана за војниците“ во тие области, кои сè уште се под израелска окупација.
Нападите, како што пишува ХРТ, се нов тест за кревкото примирје што стапи во сила на 10 октомври.
Завчера и вчера изврши напади во Газа, за кои рече дека се одговор за смртта на еден израелски војник, убиен во Појасот, додека палестинските здравствени власти соопштија дека во овие напади загинале 104 лица.
Израел соопшти дека војникот бил убиен во напад од вооружени лица на територијата во рамките на т.н. „Жолта линија“, на која се повлекоа израелските трупи според условите од договорот за прекин на огнот, тврдења кои Хамас веднаш ги негираше.
Инаку, израелската војска објави список од 26 милитанти кои беа цел на бомбардирањето претходно оваа недела, вклучувајќи еден за кој се вели дека е командант на Хамас кој учествувал во нападот врз Израел на 7 октомври 2023 година, што ја предизвика војната.
Владата на Хамас, пак, соопшти дека списокот е дел од „систематската кампања на дезинформации“ на Израел, чија цел е „прикривање на злосторствата против цивили во Газа“.
Министерството за здравство на Газа соопшти дека 46 деца и 20 жени се меѓу 104 убиени во воздушните напади.