Извор запознаен со ситуацијата изјави дека ослободувањето на Александер, последниот преживеан двоен американски заложник држен во Газа, се очекува денес, еден ден откако Израел беше информиран за одлуката на Хамас да го стори тоа како гест на добра волја кон претседателот Доналд Трамп
Израел не се согласил на прекин на огнот ниту на договор со Хамас за ослободување на затвореници, изјави денес израелскиот премиер Бенјамин Нетанјаху, пред очекуваното ослободување на израелско-американскиот заложник Едан Александер.
Извор запознаен со ситуацијата изјави дека ослободувањето на Александер, последниот преживеан двоен американски заложник држен во Газа, се очекува денес, еден ден откако Израел беше информиран за одлуката на Хамас да го стори тоа како гест на добра волја кон претседателот Доналд Трамп.
Ослободувањето, по четиристраните разговори меѓу Хамас, САД, Египет и Катар, би можело да го отвори патот за ослободување на преостанатите 59 заложници кои сè уште се држат во Газа.
Но, Нетанјаху рече дека Израел се согласил само да дозволи безбеден премин за Александер и дека неговите сили ќе продолжат со неодамна објавените подготовки за засилување на операциите во Газа.
„Преговорите ќе продолжат под притисок, како подготовка за интензивирање на борбите“,
соопшти неговиот кабинет, додавајќи дека воениот притисок го принудил Хамас на ослободување.
Неочекуваната вест за разговорите меѓу Хамас и САД дојде непосредно пред Трамп да замине во посета на Персискиот Залив, која не вклучува посета на Израел.
Хамас вчера соопшти дека разговарал со САД и се согласил да го ослободи Александер, потег што клучните арапски посредници Катар и Египет го нарекоа охрабрувачки чекор кон продолжување на преговорите за прекин на огнот во енклавата разорена од војната.
Во соопштението, семејството на Александер им се заблагодари на Трамп и на неговиот специјален пратеник Стив Виткоф, велејќи дека се надеваат оти одлуката ќе го отвори патот за ослободување на другите заложници, од кои се верува дека само 21 се живи.
„Апелираме до израелската влада и преговарачките тимови: ве молиме не запирајте“,
додаде семејството.