Либанската државна новинска агенција објави дека Израел извршил воздушни напади врз повеќе локации во јужен Либан и дека најмалку едно лице е убиено, а шест се ранети
Израелската војска утрово соопшти дека изведува опсежни напади врз цели на Хезболах во Либан и ги повика жителите во близина на областите што ги користи милитантната група на југот на земјата да се евакуираат заради сопствена безбедност.
Како што јавуваат светските медиуми, нападите следуваат по едни од најтешките прекугранични размени на оган меѓу израелската војска и Хезболах, речиси една година од почетокот на конфликтот на Блискиот Исток меѓу Израел и милитантните групи во Газа и Либан.
Портпаролот на израелската војска Даниел Хагари денеска изјави дека одбранбените сили на Израел почнале со напади на терористички цели низ Либан, по индициите дека Хезболах се подготвува да изврши нови напади на израелска територија, пренесува „Гардијан“.
„Ги советуваме цивилите во либанските села лоцирани во, и до зградите и областите што ги користи Хезболах за воени цели, како што се оние што се користат за складирање оружје, веднаш да ги напуштат заради сопствената безбедност“,
рече Хагари во видеопорака објавена на платформата Икс.
IDF Spokesperson RAdm. Daniel Hagari exposing Hezbollah’s way of firing missiles from civilian homes, and how the IDF plans on dismantling it: pic.twitter.com/smkfjv6VDh
— Israel Defense Forces (@IDF) September 23, 2024
Во меѓувреме либанската државна новинска агенција објави дека Израел извршил воздушни напади врз повеќе локации во јужен Либан и дека најмалку едно лице е убиено, а шест се ранети.
Според извештајот на агенцијата, во нападите е убиен сточар, а двајца членови на неговото семејство се ранети, додека четири лица се префрлени во болница.
Акцијата на израелските одбранбени сили доаѓа еден ден откако Хезболах, кој ја има поддршката на Иран, истрела ракетен бараж на израелска територија. Имено, милитантната група вчера рано наутро истрела повеќе од 100 ракети низ широка област во северниот дел на Израел, од кои некои, според извештаите, паднале во близина на градот Хаифа.
Претходно во петокот Израел изврши воздушни напади врз главниот град на Либан, Бејрут, во кои загинаа најмалку 45 лица, меѓу кои и еден од лидерите на Хезболах.
„Влеговме во нова фаза, чиј наслов е битка без извесен крај“,
изјави заменик-шефот на Хезболах, Наим Касем на погребот на убиениот командант Ахмед Вахаби, кој ги предводеше воените операции на нивните специјални сили Ар Радван во војната во Газа од почетокот на годината.
Интензивираната размена на оган меѓу Израел и Хезболах беше причина генералниот секретар на Обединетите нации (ОН) да предупреди дека последните случувања го зголемуваат ризикот Либан да се претвори во друга Газа.
Израелскиот претседател Исак Херцог вчера го обвини Хезболах за ескалација на насилството и рече дека неговата земја не е заинтересирана да биде во војна со Либан.
Американскиот претседател Џо Бајден денеска изрази загриженост за тензиите на Блискиот Исток и увери дека ќе стори сѐ што може за да избегне проширување на конфликтот.
Претходно Пентагон информираше дека американскиот секретар за одбрана Лојд Остин разговарал со израелскиот министер за одбрана Јоав Галант.
Во разговорот, Остин ја повторил загриженоста поради ескалацијата на тензиите меѓу Израел и Хезболах и ја нагласил вербата на САД во „важноста од постигнување дипломатско решение што ќе им овозможи на жителите безбедно да се вратат во своите домови од двете страни на границата“.
Тој му рекол на Галант дека САД продолжуваат да вршат притисок за договор за ослободување на заложниците и прекин на огнот меѓу Израел и Хамас и ја потврдил посветеноста на САД за безбедноста на Израел.